張智霖視帝呼聲高 明年再拍TVB劇

據悉,被視為無綫台慶頒獎禮前哨戰的馬來西亞Astro頒獎禮於12月1日舉行,據知憑《衝上雲霄II》人氣急升的無綫「非親生仔」張智霖(Chilam),由於特意請假出席撐場,故盛傳視帝寶座已十拿九穩,另亦有指他很大有機會於12月16日舉行的無綫台慶頒獎禮上再下一城奪視帝。而Chilam與無綫關係日趨緊密,除已落實答允明年合作《衝》劇電影版外,有指無綫方面已與他達成協議,明年再歸隊拍劇。

Chilam接受電話訪問說:「我係會出席Astro喎!因為11月30日我會喺馬來西亞舉行演唱會,都係留多一日啫!(TVB搵你再拍劇?)係有咁的打算,傾過吓,如無意外會係出年下半年的時裝劇。成件事雙贏又冇負面因素產生喎!咁點解唔做呢?(聽講你今年攞硬視帝。)獎項我多多都歡迎,但平常心啦!(你唔係親生仔都對你咁好?)如果成真,咁咪證明佢哋公平囉!(唔驚畀人話拍劇換獎?)乜有得換咩?我以前年年都拍一套,又唔見頒個獎畀我?哈哈!」

張智霖

吳鎮宇黎耀祥睇好張智霖封帝

同樣憑《衝上雲霄II》人氣急升的吳鎮宇,則謙稱未收到Astro方面邀請,並大方向張智霖送上祝福:「祝Chilam旗開得勝啦!其實唔係咁多頒獎禮邀請我出席,即係證明我還需努力囉!(無綫視帝有冇信心?)我覺得機會唔大,但無論如何TVB係我母校,我出年都會返去拍劇。」

此外,同是大熱之一的黎耀祥坦言看好Chilam及吳鎮宇,提到Chilam不是無綫親生仔,他說:「呢樣嘢唔重要,最緊要觀眾認同。」問到台慶頒獎禮有沒有信心?他說:「普通啦!都係睇大家反應,始終佢哋嗰部《衝上雲霄II》係大製作。(蝕底啲?)少少蝕底啦!佢哋套劇的而且確各樣都好受落。」