由82年《430穿梭機》到今日《放學ICU》，由18歲開始做到半百之齡，譚玉瑛將青春全奉獻給無綫兒童節目，可惜，譚玉瑛姐姐年代快將結束。據悉無綫計劃改革兒童節目，要主持年輕化，決定踢譚玉瑛出局，一方面要她轉合約形式，由主持變成顧問，僅間中「出吓鏡」，但同時卻又遲遲不跟她洽談新約，疑採拖字訣，讓本月底約滿的譚玉瑛變成「自然流失」，譚玉瑛昨無奈說：「其實呢一日始終都會嚟。」

在無綫主持兒童節目32年的元老級人馬譚玉瑛姐姐，多年來不止一次被傳遭無綫踢出局，但最終譚玉瑛仍幸保不失繼續留低。然而，消息指無綫近日再度向譚玉瑛開刀，要將她飛出兒童節目主持行列，本月底約滿後不再續約。

■譚玉瑛（中）高高興興賀主持兒童節目30年，如今已成香港人的集體回憶。

「呢日始終會嚟」

記者昨致電譚玉瑛，她承認本月底約滿無綫，並說：「上個月公司想同我轉合約，係Sandy（余詠珊）同我講，但傾過一次之後冇再傾。佢想請一啲比較年輕啲嘅主持，想我做顧問。」是否不再在兒童節目亮相？譚玉瑛說：「可能佢未諗得掂，佢話耐不耐出吓鏡，但就轉做顧問畀意見個節目點樣發展。」

譚玉瑛透露當日余詠珊強調不會減她人工，是否接受做顧問？譚玉瑛說：「要睇吓條件係點，我唔會抗拒，因為就算我自己唔再做幕前，我都想個節目有好發展，因為自己做得太耐，有感情。」

對無綫這個安排會否感到難受？譚玉瑛未有正面回應，只說：「都幾突然，突然間有種『咁呀？』嘅感覺。舊陣時係talent（藝員部）傾，但今次talent話要搵Sandy同我傾，Sandy又好忙。」但另方面有傳無綫決定不再跟譚玉瑛續約，讓本月底約滿的她「自然流失」，譚玉瑛說：「藝員都係被動嘅，我又可以點呢？其實以前都有傳過我會唔做，我諗……我都係睇吓公司決定點。」

為無綫盡心盡力多年卻落得如此下場，會否灰心、不開心？譚玉瑛無奈說：「其實呢一日始終都會嚟，重整心理，再過嘅日子可能唔同咗。我都照平常咁做番自己嘢，唔好畀一個未知道將會係點嘅事擾亂自己生活。不過我就希望可以清楚啲知道件事將會點做，咁對大家都好啲。」

「平常心咁生活」

記者指王維基的香港電視網絡（HKTV）開不成台，更助長無綫提出苛刻續約條件，藝人往往迫於無奈接受，對此譚玉瑛說：「不嬲都係咁樣。」可認為無綫基於輿論壓力不敢炒她，所以才「借啲意」說轉合約形式，譚玉瑛說：「你個理解係咁，或者係咁，我自己唔會諗咁多，因為做咗咁耐，都好知道做藝人其實好被動。」

對將來計劃及工作安排，譚玉瑛坦言未有想得這麼長遠：「o依家呢個階段，盡量嗰件事唔好困擾我自己，平常心咁生活，我又唔想啲同事好似唔捨得我咁嘅情緒。」記者指今次報道出街後，無綫可能立即轉軚另作處理，譚玉瑛笑謂：「咁又係，都見過有咁嘅事情發生。」

人物誌：四朝元老

由82年的《430穿梭機》到現時的《放學ICU》，30多個年頭，譚玉瑛姐姐堅守兒童節目主持崗位，亦是唯一做過四代兒童節目的人。她昔日的拍檔梁朝偉、周星馳，分別貴為康城影帝及一代笑匠，而譚玉瑛姐姐亦成兒童節目icon，是一眾70、80及90後的集體回憶。

《430穿梭機》時代（82-89）

最人才濟濟的年代，主持有梁朝偉、周星馳、鄭伊健、曾華倩和藍潔瑛等，當年《黑白殭屍》環節，譚玉瑛姐姐扮演研究殭屍的專家譚博士。

《閃電傳真機》時代（89-99）

由《430穿梭機》演變成，當時譚玉瑛姐姐已孭重飛，其中她於環節《Auntie烏卒卒》內扮演占卜師烏卒卒更是深入民心！

《至NET小人類》時代（00-04）

每日由不同主持於《至NET工作坊》環節教授小朋友煮食、藝術、運動及音樂等知識，譚玉瑛姐姐是負責教小朋友製作不同食物。

《放學ICU》時代（05-現時）

起初譚玉瑛姐姐還有主持《英語升LEVEL》環節，其後因Mark Ryan加入教英語，故後期譚玉瑛姐姐變成主力演出兒童連續劇《諸氏家庭》。