忽然一周 774期

原來波大真係冇腦 o架！（設計對白）
唐貝詩一時貪玩搞出軒然大波，值得後生仔女引以為鑑。

媽咪姐手帳

唐貝詩虐貓招群插　寇鴻萍代女謝罪

2010年05月28日

養兒一百歲，長憂九十九。呢句說話真係一啲都冇講錯。
21歲嘅唐貝詩，因周一（ 24日）凌晨喺微博上載咗一段盆景貓嘅留言及圖片，短短十分鐘，立即引起無數藝人聲討。唐貝詩知衰，立即將留言剷走。無奈依然難壓各方憤怒譴責，連累寇鴻萍要喺網上立即替女兒道歉。

不過，由於唐貝詩解釋牽強，毫無悔意，周三（ 26日）報章及雜誌大肆報道，似乎難抑眾怒。寇鴻萍出席佢旗下嘅品牌活動，再三當眾為女兒道歉，真係尷尬到暈。
成個風波嘅起源，係始於周一（ 24日）凌晨，唐貝詩喺微博留言：「我今天訂購了一隻盤（盆）景貓，明天便有貨。養盤（盆）景貓，不會再唔見。」
媽咪姐知道，所謂盆景貓只係一個惡作劇，唐貝詩亦唔係有心虐貓。不過呢種腦殘級玩笑，意識不良，亦有鼓吹虐貓之嫌，唐貝詩真係要反省。

呢張盆景貓照片，有指係電腦合成照。

網民唔止狂插唐貝詩，連寇鴻萍亦被指摘教女無方。

寇鴻萍同唐貝詩平時「有影皆雙」，估唔到竟然冇聯絡方法，似乎有啲耐人尋味喎。

兩母女冇溝通

不過，佢兩母女嘅關係又幾撲朔迷離。事關早幾日媽咪姐發現，原來呢個阿媽竟然要靠微博同正身在英國讀書嘅大女唐貝詩通訊，大女就連阿媽嘅電話號碼都冇，要喺微博上面問阿媽攞聯絡方法，認真騎呢。唉，佢哋母女關係係點，可想而知。

道歉兼宣傳

繼喺網上道歉後（小圖），周三（ 26日），寇鴻萍喺香港公園佢旗下嘅餐廳 L16搞咗個宣傳活動。再次為愛女道歉：「佢小朋友諗住玩吓，隻貓唔係真嘅。不過攞生命嚟開玩笑的確唔啱，我應該早啲制止佢。總之大家都有愛心嘅！」由於發生呢件事，當日大批傳媒出席佢嘅宣傳活動，寇鴻萍今次都算因禍得福！

26/5

25/5

群星圍插

鄭裕玲
What you posted was senseless, tasteless, thoughtless and not funny at all!
身為寇鴻萍老死，唐貝詩契媽嘅鄭裕玲，連續兩日留言，真係愛之深責之切。

契女都冇情講！（設計對白）

周柏豪
叫她不如真的收貨後，上載相片給大家看，看看我報不報警！
有 5隻貓嘅周柏豪，係成件事中最激動嘅藝人之一。

G.E.M.
發明這玩意、欣賞這玩意、支持這玩意的人，心被甚麼吃了？

關智斌
可愛？ cute？對不起，完全接受不了，只感到心寒！

諸葛梓岐
隻貓好慘，整同諗嘅人好變態。

伍詠薇
這玩具意識太變態，令人不安……我笑不出，我們替你難過。

鄭秀文
呢個玩意等同虐貓，好心痛。

乜嘢係盆景貓

所謂盆景貓，其實只係網絡上嘅惡作劇。 2000年美國一個網站率先提供教人飼養盆景貓嘅方法，由於照片極度殘忍，引起市民及愛護動物者聲討，甚至連 FBI都介入調查，後來至發現張相係電腦合成，根本冇咁嘅事。

虐貓可監禁 3年
愛護動物協會發言人顏小姐回應，暫時未收到有關呢件事嘅投訴。但如果真有盆景貓呢回事，一定係虐畜，罪名成立嘅話，最高可罰款 20萬及監禁 3年。