玄學師傅麥玲玲簽咗無綫藝員合約後，一直都等緊機會拍劇，佢早幾日終於收到開劇通知啦！首次拍新劇《牛頭愛搭馬嘴》，會同歐陽震華（Bobby）、萬綺雯（蚊蚊）合作。

玲玲師傅喺劇中係飾演蚊型雜誌社嘅老總，會同屬下「蝦頭」楊詩敏經常一齊去採訪新聞，所以同飾演警察嘅Bobby、蚊蚊都有對手戲，不過佢就經常欺壓蝦頭。

玲玲師傅講起第一次拍劇好興奮，因為可以同好戲嘅Bobby、蚊蚊、蝦頭合作，但美中不足係冇感情線，佢話：「真係好可惜，冇呢啲員工福利，反而蝦頭都有得暗戀李思捷。冇感情線，冇得同蚊蚊爭Bobby啦，其實根本冇得爭，蚊蚊嘅42吋長腿冇得比，佢對腳長過我成個人！」

玲玲師傅唔使咁謙喎，其實佢心口都有條4吋長嘅事業線！都唔係好輸蝕o架！

玲玲師傅首次拍劇，已經拍住福將Bobby同蚊蚊！