楊怡 姐前姐後三分險 只想實至名歸攞獎

楊怡(阿怡)由訓練班開始於無綫默默耕耘了十多年演技毋庸置疑,憑實力上位要取代離巢的佘詩曼(阿佘)「阿姐」地位不難,但阿怡認為每個藝人都是獨一無二無可取代,沒有人能取代阿佘,同樣道理楊怡亦是只得一個,笑言「姐前姐後三分險」自己只想做一個好演員無意做「阿姐」﹗

〈採訪〉︰康蕎
〈攝影〉︰Gary
〈化妝〉︰Marsha@A&V Makeup School
〈髮型〉︰Ben Lee@TT Salon
〈服裝〉︰Bread n Butter
〈場地〉︰曼聯餐聽

入行十多年的阿怡於無綫新劇《真相》內首次扮演律師,與剛播畢口碑不俗的《怒火街頭》同樣以律師為人物背景,對此,阿怡坦言早有心理準備被人拿來與胡杏兒比較︰「大家都係律師戲預咗,不過大家睇落就會明白係有分別,《怒》演繹手法會輕鬆啲感情線重啲,《真》就會較着重案情,貼近現實多啲,所以我演繹起上嚟比較有壓力,因為有好多法庭戲好多專業名詞對白要死背﹗不過,最吃力都唔係呢樣,而係拍攝時我健康出現問題,體能同精神方面真係令到我感到好吃力﹗」

原來拍攝《真》片期間阿怡因為多年積勞成疾,身體扺抗能力差以致感冒菌走到左邊面部神經線出現輕微面癱︰「我當時真係好擔心,雖然未至於去到面癱控制唔到肌肉,但當時嘴角都有微微向下垂講對白都有少少口齒不清,但我又唔想因為自己一個阻礙整套劇集拍攝進度,於是照撐住開工,壓力真係好大,一路拍一路做針灸治療個幾月,好彩最後都醫番好冇事﹗」

積勞成疾險面癱

談到阿怡病倒亦要撐住開工,午夜夢迴可曾羨慕過姐姐楊娜可以嫁人生女有老公照顧?阿怡坦言︰「講真我都31歲,身邊好多朋友都結婚生仔,當然會觸動我嘅神經想有個家,我都好想可以結婚拖住另一半堂堂正正咁行出嚟見大家,但好可惜嗰個人我真係仲尋覓緊﹗(圈外緋聞男友藍偉傑同楊志翹呢?)大家真係只屬好朋友咋﹗總之我有信心將來緣分一到,我就會遇到啦﹗」

續問到是否因為她事業心較重未達到「視后」的目標所以就算有亦看漏了眼時,阿怡就坦言與得獎與否無關係,只是緣分未到而已。至於入行十多年一直默默耕耘會否恨拿「視后」一獎?楊怡就坦率地答道︰「我係恨拎呢個獎,想有呢個名銜,我好想將來拎到呢個獎上手嘅時候,大家都會認同我應該拎,而唔係因為我做咗十幾廿年都應該輪到我拎﹗」

每個藝人難取代

而對佘詩曼(阿佘)離巢往外闖後有指阿怡獲無綫力捧上位取代阿佘一姐位置,阿怡就認為每個藝人都是獨一無二,阿佘沒有人能取代,楊怡亦是只得一個,無綫是個大家庭需求量大,能容得下不同類型的演員﹗笑談到不喜歡「取代」二字可以改成升格為「阿姐」時,楊怡就笑說︰「嘩,姐前姐後三分險,我好抗拒阿姐呢個名,我唔想做阿姐,我只係想做一個好演員,希望觀眾睇到我努力覺得我進步認同同埋喜歡我﹗阿姐呢個級數真係要嘟姐(鄭裕玲)同阿姐(汪明荃)呢啲咁有實力同經驗先受得起﹗」

楊怡

楊怡

楊怡