恭喜恭喜!現年37歲滕麗名，今日喺泰國蘇梅島嘅沙灘舉行婚禮、同金融才俊男友朱建崑（Matthew）結婚喇。晚上七點幾，阿滕喺facebook上載咗一張身穿tube dress婚紗，同老公肩並肩嘅照片，老公輕摟住阿滕，見到阿滕流露一臉幸福笑容，十足十小鳥依人咁，幸福滿溢。兩人稍後便會回港補擺喜酒。

婚禮喺W酒店舉行，只邀請好友出席。本月4號阿滕隻身由香港機場出發赴泰準備婚禮，力保低調。而今次舉行婚禮嘅地方，沿岸海邊景色迷人，靚人靚景極盡浪漫，啱晒熱愛水上活動嘅阿滕。阿滕老公為Canon高層，兩年幾前相識，屢傳婚訊，依家正式修成正果，女人尋尋覓覓都係為著找到幸福，見到阿滕同老公一副甜到漏嘅樣，都感受到兩人嘅幸福!

其實阿滕感情路一直不大暢順，同魏駿傑、郭政鴻嘅兩段情亦未能開花結果，早前更遭魏駿傑夫婦喺內地節目一唱一和、暗示佢曾向魏駿傑迫婚。一直封口嘅阿滕終於忍唔住爆料，指事實係男方曾求復合，還其清白。

阿滕兩年前同圈外男友Matthew低調發展戀情，即使經常被拍得恩愛拍拖，阿滕都避談感情事，小心保護這段戀情。之前阿滕曾經揚言考慮婚後努力造人，依家正式禮成，佢哋又身處咁浪漫地方，希望快啲聽到兩人好消息啦!恭喜恭喜!