70年代影星劉香萍是非一般星媽，為捧乖女貝安琪（Ankie）仆心仆命，唔單止多次開戲畀個女做主角，每當出席各大電影活動都會向友人力Sell，之前貝安琪首次在港拍TVB重頭劇《巨輪》，劉香萍仲甘願做「二打六」，飾演貝安琪戲中媽媽去?實個女！為報答偉大的媽咪，於母親節前夕Ankie撇下媽咪潛出街「濕平」，悉心揀選色彩斑斕的靚外套褸、靚袋做禮物！雖然劉香萍未飲到女婿茶，但唔緊要，Ankie仲會加送多一個自家製的德國傳統蘋果蛋糕，要媽咪甜到入心！採訪：方騫平　攝影：李權威 服裝、場地：coach

講起媽咪，貝安琪勁讚世上只有媽媽好：「佢真係好錫我㗎，佢知道我鍾意演戲，就安排好多機會畀我，稍後仲會開拍新戲《願望樹》，我會同曾志偉、尹子維合作演出。只要我開心，佢就會開心。之前我拍TVB劇《巨輪》，媽咪為咗喺身邊照顧我，同我翻譯劇本，都肯做個小角色，佢真係好偉大。」

陳展鵬100分

提到初嚐拍電視劇滋味，貝安琪形容又愛又恨，因為拍攝過程超級辛苦，每日拍足22個小時，對白又多，最凍一日仲要同陳展鵬落水拍咀戲，好攞命！不過，同陳展鵬合作都幾值得回味：「戲中我飾演陳展鵬同鍾嘉欣嘅第三者，是一個不擇手段去搶人男友嘅CEO，性格同現實中完全唔同，所以都幾好玩，而展鵬好識做人，好Nice、好Cute、好靚仔，我都幾鍾意呢類型男仔，拍完之後都幾掛住嘅！（母親節帶佢見家長？）唔使啦，開工時媽咪成日都見到佢，媽咪對佢都幾好印象。」

貝安琪談到首拍香港電視劇非常興奮，但開心完又勁呻辛苦。

同陳展鵬拍水中咀戲，貝安琪坦言好難忘，因為又凍又攰。

一上水即要保暖，雖然拍戲辛苦，但一諗起展鵬即冧笑。

貝安琪同媽媽感情好好，貝媽媽在事業上給她不少支持。