官恩娜隱形富二代上位靠自己索爆妹妹官恩沂被起底

2013.05.02 1245

專訪

被喻為「隱形富二代」的官恩娜（Ella）犯賤，唔做千金小姐選擇「捱驢仔」，紆尊降貴在獨立細公司捱足八年，直至去年終於守得雲開捱得出頭天，以600萬轉會華納唱片，由樂壇「二打六」升呢做「一姐」，身價十級跳！自信返晒嚟。被踢爆爸爸是鑽石礦礦主，Ella一直有富爸爸撐腰，她大賣口乖去為自己辯解：「我嘅後台只得華納唱片！打從18歲出道做Model，爸爸從來冇幫過我，咁講抹煞咗我同舊公司同事咁多年來嘅努力，對我哋唔公平。我相信，靠努力獲得嘅成功，生命才有意義！」

官恩娜（Ella）出道9年（計埋初入行做Model）一直默默向上游，只要有機會踏上台板作Solo演出，從來唔推job，勤力爛做，聽話到冇人有！但「順得人」原來是家底豐厚的千金小姐，最近她更月租15萬進駐加多利山「明星竇」，跟富貴藝人劉德華、陳慧琳、房祖名等為鄰。

「隱形富二代」官恩娜有話要說：「冇咁誇張（富有），其實爸爸喺香港做珠寶生意，我只係出身小康之家，食得飽、瞓得暖，有鍾意嘅工作經已ok。父母係生意人，唔識娛樂圈嘅事，所以從來唔會干預；而且由細到大，佢哋畀子女好大嘅自由度，除非我遇到挫折，佢哋先至喺精神上支持。喺經濟上，我可以自給自足，冇用過屋企嘅錢，以前做Model搵得少，咪慳住使，直至近年財政狀況轉好，每個月更畀過萬蚊做家用。其實我好慳家，只係對個電飯煲有要求，因為我淨係識得煲飯，其他都冇乜所謂。」問到爸爸可有要求她承繼衣鉢？她避忌道：「我冇興趣做生意，對珠寶又無研究，都係交俾妹妹接手打理家族生意。」

負面新聞感麻木

做藝人雖然好辛苦，日日忙到爆，但成功感好大，辛苦得有價值！「就算最艱辛時候我都冇氣餒過，我真係好享受演出?。唯一最唔開心09年30歲生日，竟然有報道話我將村屋當私竇，招待唔同國籍男士，好委屈，感覺好似世界好邪惡，事實竟被扭曲了，經此一役，依家反而對負面新聞感到麻木，冇乜上心。」

2015年登陸紅館

去年Ella加盟華納唱片旋即獲捧為一姐，公司花費30多萬安排她與助手、髮型、化妝師等10人飛往台灣拍攝最近派台新歌《So In Love》MV，預計6、7月會出碟，還會狂接廣告及接拍大陸劇，開拓網上平台市場，2015年登陸紅館舉行處女個唱。她戰戰兢兢說：「一姐只係封號啫，但我受唔起，太誇獎啦，最重要係努力，我冇諗過要挑戰天后容祖兒，都係做好自己，做好音樂，按部就班啦。我有搵老師學唱歌，自我增值嘛，希望有進步嘅空間。」

10年期票贈男友

在感情路上，Ella曾被吳卓羲觸痛過，幸而今時今日，她感情事業皆得意。舊事不須記，她不屑一提：「做人要向前行，期待明天有好事發生，依家係人生最開心嘅時候。」雖然今年33歲，跟拍拖4年的醫生男友Juan感情穩定，但Ella未有結婚打算，還開了10年期票給男友，預告他等得就等：「以前冇方向，會全副精神投入拍拖，家陣事業係我嘅一部份，我冇興趣做醫生太太，亦想要空間，唔希望玩同居。如果佢唔接受、唔欣賞我咪算咯，我相信緣份，更加唔怕佢會有女埋身，做女人要有自信心，日日提心吊膽壓力會好大，最重要係講求兩個人嘅相處，要互相扶持，所以我會俾超級大自由度佢，唔會check佢電話、facebook同email。不過，講到底，佢唔太鍾意我出外工作太耐，但我唔會理會咯。」

採訪：方騫平　攝影：譚壹致
髮型：Eve Chiu@Queen’s Private i
服裝：collect point
場地提供：dream café

官恩娜坦言入行以來從來無問過屋企人攞錢，全部自給自足，收入不多但活得開心。

Ella跟混血醫生男友Juan-Domingo Maurellet愛得簡單，會拖住手行平民商場。