無綫一線小生陳豪（Moses）快將約滿無綫，眼見林峯、鄭嘉穎在內地拍劇賺到盆滿缽滿，加上他的內地身價高達30萬元一集，比他在無綫拍劇5萬元一集高出6倍，難怪陳豪心郁郁！據知，無綫為留住陳豪，除了為他傾拍內地劇，更將他與黎耀祥主演的新劇《傳愛事務所》定為今年無綫台慶劇，為陳豪再做視帝鋪路！

無綫近年大鬧小生、花旦荒，想不到，近期連無綫「台柱」人物陳豪也快將約滿，無綫雖已頻頻「捉」陳豪傾續約，望加簽幾年，但據知一直聽教聽話的陳豪（Moses）卻有意向外闖！近年Moses成了廣告寵兒，廣告一個接一個，吸金不少，但始終在無綫拍劇身價只得約5萬元一集，收入相比在內地拍劇的無綫小生如林峯、鄭嘉穎等，收入可謂「天與地」！再加上Moses剛買了三千多萬大埔獨立屋，又正積極計劃娶老婆，實在需要不少「銀彈」作後盾。

不少花旦萌去意

據知，內地不少製作公司願出超高價向這位無綫人氣王招手，開出6倍高價的30萬一集，以銀彈力邀Moses拍內地劇。對於還未正式打開內地市場的Moses來說，價錢相當吸引，難怪他心郁郁打算請假向外闖！為了留住Moses這隻「金蛋」，無綫亦正積極為Moses物色適合他接拍的內地劇，投其所好！據知，無綫已幫Moses談好一部內地劇，稍後他便會北上開工。為進一步留住Moses，無綫更將他與黎耀祥主演新劇《傳愛事務所》定為今年無綫台慶劇，令曾在2007年憑《溏心風暴》奪兩料視帝的陳豪，今年能梅開二度。

除Moses外，其實無綫不少花旦也萌生去意，如陳法拉今年5月約滿，亦不急續約，希望先讀書增值自己，看清楚形勢才決定去留；另一花旦楊怡亦有向外闖之意。

無綫積極留「金蛋」

記者就無綫是否正跟陳豪、楊怡傾續約一事，致電無綫製作資源部總監樂易玲詢問，她說：「佢哋全部都傾咗好耐，包薪藝員嘅合約向來都唔會等約滿時先傾，我哋耐唔耐都會叫佢哋傾合約，有啲未滿就已經『加監』，好似林峯咁，我哋都想同佢傾，但佢仲忙緊拍劇，未有時間同佢傾。」談到Moses想外闖拍內地劇搵真銀？樂小姐亦坦言對方的確想請假向外闖，更謂：「佢都拍咗咁多部劇，所以想拍吓大陸劇同電影，而TVB亦幫佢傾緊大陸劇，時裝、古裝都傾緊。」

陳豪北上身價高達30萬人仔，難怪心郁郁想離巢！ 資料圖片

兩大視帝救亡《傳愛事務所》變台慶劇

無綫最近的劇集雖屬大製作，但收視卻只一般，不得不快些諗計「救亡」！據知，無綫有意搵兩位視帝陳豪和黎耀祥合作的劇集《傳愛事務所》作救亡之作，對此，《傳》劇監製徐正康坦言也有所聽聞，他更表示對此劇相當有信心，他謂：「我依家都睇緊片，做後期工作，對各樣都好滿意，兩個（指陳豪和黎耀祥）都好快掌握到情緒，（師奶睇唔睇得明先？）原則上起碼『入到口』先，呢個係我要求嘅大前提。」

談到此乃台慶劇，豈不是陳豪及黎耀祥兩位主角會爭今年視帝？徐正康笑言：「我又唔敢咁快作評論，但係都有機會。（你睇好邊個？）佢兩個都有自己獨特設計。」說到此劇乃救亡之作，他說：「唔好咁講，不過呢個劇嘅劇種同卡士都好好，係穩陣嘅。」

楊怡快約滿 望向外闖

楊怡乃無綫頂頭花旦之一，說到有指她也快將約滿無綫，並想向外闖，故暫時不想傾約，楊怡昨日就此事接受記者電話訪問，她坦言：「其實我同公司一路都有傾緊（續約），（係咪就快約滿？）差唔多啦！（傾約有乜要求？）哈哈！我淨係想瞓覺，我依家日日拍《On Call 36小時II》都已經拍到暈。」談到不少小生也到內地拍大陸劇搵真銀，她表示自己只拍過一套，問她會否也想有多些機會拍大陸劇？她笑謂：「梗係想啦！始終都想多啲機會做多啲唔同嘅嘢！」