最近張家輝晒肌成為熱話，年過半百嘅張國強（KK）都唔執輸，前晚喺無綫新劇《情越海岸線》亦犧牲色相。劇情講述朱璇飾演嘅Maggie姣黐張國強飾演嘅程Sir，KK剛啱沖完涼，朱璇即衝入廁所，KK全身赤裸令人想入非非。估唔到今次露得最多唔係朱璇，而係56歲嘅KK騷body，隱隱見佢有五嚿半腹肌，由廁所打到出大廳，睇到一班師奶粉絲o依嘩鬼叫。

露到上咗癮

KK梗係唔認劇情重口味，噚日喺電話度笑笑口話：「我都就嚟六張嘢，叫我阿叔、阿伯都冇所謂，但如果大家見我嘅身材，可以喚醒大家要注重健康，有一啲效應，我覺得幾好。」KK仲自爆啱啱拍咗另一部無綫劇《舌劍上的公堂》一樣要露上半身，唔通露到上咗癮？佢話：「唔會，睇番劇情需要啫，《舌》劇話我練緊功夫嘛。」

■今年56歲嘅KK露得比朱璇仲多，真係大犧牲。
電視圖片

■KK係運動員出身，自言冇刻意操弗，正常運動就已經有5嚿半腹肌。
電視圖片

「這個才叫做愛」

練功都要除衫？合唔合情理見仁見智，講番《情》劇，KK同盧宛茵（Madam）做夫妻，好多人覺得老妻少夫，一啲都唔襯，KK幫口話：「其實Madam大我兩年（實際3年），佢飾演嘅師奶好稱職，劇情係講佢一路肥，我就係操得好弗嘅體育老師，有乜唔襯都係我做得唔好。」KK都承認近年甘草演員流失率高，佢話唔介意越演越老，有多啲唔同角色發揮仲開心。

■朱璇持刀追殺KK嘅老婆盧宛茵，但觀眾就覺得KK同盧宛茵外形唔多襯。電視圖片

■《情越海岸線》黃浩然同楊明等猛男亦有晒肌。電視圖片