呢排無綫班視迷唔係講劇集《金枝慾孽貳》有幾悶，就係講劇集《神探高倫布》有幾神，㷫到幾乎想熄電視，唯一係星期六晚嘅《玩嘢王》至令大家有興趣開番個電視嚟睇，《玩嘢王》播咗三集，先後令林盛斌（Bob）、馬賽同埋鍾嘉欣人氣勁升，節目主持李思捷真係應記一功。

Bob話搞單大嘢

總共七集嘅《玩嘢王》差唔多播咗一半，反應咁好，本來想添食，不過好有難度，無綫非戲劇製作總監余詠珊噚日喺電話度話：「未諗添食，因為比較難，思捷行出嚟大家已經知佢係整蠱人。」反而余詠珊有另一構思，佢話：「我哋諗緊搵個機會畀曾經俾思捷整蠱過嘅同事，大反擊整蠱或糟質番思捷！」噚日阿Bob聽到話有可能整蠱番思捷即舉腳贊成：「百分百贊成，俾佢玩過嘅都會湧出嚟呀！搞單大嘢等佢估唔到，上次佢動員過百人整蠱我，諗都冇諗過，若果整番佢，就搵個主辦商話喺內地開演唱會，全場兩、三萬觀眾都係Johnson兵團，到時爆破、暴亂、打劫、火燭都齊，咁我就順番條氣喇！」

另外，嚟緊第四集嘅《玩嘢王》，思捷搵咗曹永廉幫手，玩欺騙感情，要曹永廉扮炒燶股票問人借錢，結果阿廉好友馬國明二話不說就借咗三萬蚊。事後馬明話雖然冇聽過阿廉炒股票，不過朋友叫到自然會借，而陳敏之亦都俾另一個同事問借錢，答應借六位數字，佢直頭索腿天后上身，夠晒義氣！