無綫劇集《飛虎2》近排趕拍之中，劇中有唔少動作場面，前日馬德鐘（馬神）、鍾嘉欣同胡定欣喺大欖拍外景，劇情講述一頭白髮嘅胡定欣打暈咗嘉欣BB，搞到佢額角見紅，仲擄走埋上車。嘉欣BB劇中男友馬神見狀，即刻好英勇咁跳出馬路，仲截停架超型嘅三輪電單車死追，由大欖追到汀九，誓要救番嘉欣BB，着住飛虎制服嘅馬神加埋超型仔嘅電單車，型上加型！

嘉欣BB喺劇中俾人扑濕受傷兼擄走咁慘，應該好多男士關心啦，點知佢嘅風頭俾人搶晒，唔係，應該係俾架三輪電單車搶晒！原來架車係袁偉豪借出，拍完場戲，馬神同袁偉豪等成班男人圍埋研究架車嘅性能，都冇人理嘉欣BB，馬神仲一臉滿足咁話：「沿住海邊一路揸車真係好舒服，加埋今日嘅天氣一流！」直情將劇中女友擺埋一邊！風頭輸咗畀架型仔電單車嘅嘉欣BB都冇呷醋，因為佢都真心覺得架車型仔，仲趁拍攝空檔坐車尾兜圈遊車河。

■鍾嘉欣前日同馬神喺大欖拍新劇《飛虎2》外景，佢哋對架三輪電單車愛不釋手。攝影：藍文浩

■馬神揸住架三輪電單車，確實有型！

■馬神同袁偉豪猛咁研究架車，被搶風頭嘅鍾嘉欣都望埋一份。

拍危險戲倍留神

講起套劇先後有羅仲謙、王君馨等演員受傷，馬神太太張筱蘭曾公開話過擔心老公唔夠休息會受傷，不過玩埋飛車嘅馬神就大派定心丸：「危險鏡頭會小心同加倍留意，有時有啲普通鏡頭鬆懈都會有意外，始終呢啲劇觀眾鍾意睇，惟有小心啲啦。」

■染咗一頭白髮嘅奸角胡定欣（左），挾持鍾嘉欣上車。

■胡定欣粒聲唔出，培養情緒入戲。