鍾嘉欣、馬德鐘、羅仲謙、梁烈唯和李思捷等，今天為TVB新劇《飛虎II》開工，馬德鐘、羅仲兼和梁烈唯等還穿上特種部隊的制服上陣，拍攝圍捕黑幫人物李思捷及匪徒挾持最高法院，特種部隊與匪徒的對峙情節。一眾演員重裝備服飾，吸引到不少途人及粉絲圍觀、拍照，至於貪靚的馬德鐘獲工作人員遞上鏡子，讓他自行整理髮型外，也不時跟拍檔李思捷對稿，務求拍攝最好的效果。
提到TVB新劇《衝上雲霄II》帶起不少話題，有份參演第一輯的馬德鐘，坦言勾起不少回憶，並表明如有機會也望參演第三輯。至於鍾嘉欣表示為籌備演唱會，拍劇時也會份外小心，深怕手腳有瘀傷難看，她還指新劇中常被李思捷打，若有機會期待有天向對方還手。
飲恨《衝上雲宵II》 馬德鐘開到聲：想拍第三集
馬德鐘（馬神）﹑羅仲謙﹑梁烈唯﹑袁偉豪及李思捷等，今日喺沙田為無綫劇集《飛虎II》拍外景，現場有幾部警車做實景助陣，場口講述馬神﹑唯唯及大隻謙，圍剿捕捉幪面兼戴口罩嘅李思捷。
不過今日天氣炎熱，眾型男着住厚疊疊飛虎裝束拍劇，大汗疊細汗，見到都覺得熱，佢哋仲不停流汗，馬神同唯唯要用紙巾拭汗，真係驚佢哋會中暑，馬神就話不喪食嘢補充體力。
講開《衝上雲霄II》叫好叫座，有份演出第一集嘅馬神（凌雲志/Vincent），被問到有冇飲恨？佢話：「唔會，見到佢哋咁有型，都勾起我好多回憶，o依家着住第二種制服，希望第日兩套制服可以出現同一劇集。」
但冇得演出《衝II》，好多視迷都戥佢唔抵，覺得唔夠完美，馬神就話：「上集講我死咗，而且當時合約又喺鹹淡水交界。但咁多人鍾意，又提番第一輯都係好事，有第三集我都想拍。」
馬神開到聲咯喎，無綫會唔會考慮下呢？
場口係眾飛虎圍剿捕捉幪面兼戴口罩嘅李思捷。
熱到呢…..
馬神好貪靚
羅仲謙好型仔
不過都好大汗
好受小朋友歡迎啵
梁烈唯與途人合照
馬德鐘開到聲話若然開拍《衝III》，佢就好想拍呀，無綫會唔會考慮下呢？
演唱會舉行在即 嘉欣BB拍劇要錫身
鍾嘉欣今日都有為無綫劇集《飛虎II》拍外景，喺劇中嘉欣BB飾演刑事情報科臥底，仲同馬德鐘飾演情侶，雖然話就話做情侶，但原來一啲親熱戲都冇啵，連錫錫都唔使，難怪嘉欣BB笑言：「好好撈。」
親熱戲就冇喇，但嘉欣BB喺部劇入面要拍落水戲份，但佢又唔太識游水，咁唔知佢寧願拍咀嘴戲，定係拍落水戲多啲呢？
另外，嘉欣BB下月舉行演唱會，近日拍劇又要綵排個唱，都真係幾忙呀，為咗嚟緊演唱會能着靚衫見人，嘉欣BB就話拍劇時，特別留意唔可以撞到損手爛腳，唔想令粉絲失望。
鍾嘉欣話今次拍劇連咀戲都冇，所以好好撈。
李思捷﹑鍾嘉欣及馬德鐘喺沙田拍外景。
大合照。