爽．約part 6：向發哥偉仔星爺小春偷師 馬浚偉爛撻撻突破形象
馬浚偉（馬仔）於新劇《老友狗狗》中飾演爛撻撻的圍村仔，收視高企外，更受到觀眾激讚，一反他以往官仔骨骨的形象，他自言個角色很有發揮，他亦花了很多心機及時間去做資料搜集。多次與寵物合作的馬仔，跟「阿黃」非常合拍，就算拍竣至今，「阿黃」每見馬仔都表現得很開心，馬仔說：「狗好有靈性㗎！佢係知道邊個錫佢。」
＜統籌＞林爽兒 ＜撰文＞黃曉妍
＜攝影＞吳國明
＜場地提供＞輝叔火鍋（長沙灣天悅廣塲）
馬：馬浚偉 記：記者
記： 你喺《老友狗狗》嘅角色「周用恭」，係圍村土生土長嘅原居民，造型上都要配合番，所以經常着人字拖。
馬： 其實人字拖一啲都唔易着㗎！腳趾公同第二隻腳趾中間，好容易磨到損晒，而且又着到腳板底黑晒，所以我以前細個唔會着人字拖，係着一塊過嘅拖鞋。
記：你外形官仔骨骨。
馬：唔係。
記：你點樣去揣摩呢個角色？
馬： 知道要接呢個角色嘅時候，我就知道有好大發揮，材叔（《老友狗狗》監製梁材遠）叫我做運動、曬黑啲，爛撻撻咁款，但當我入圍村做資料搜集嘅時候，我發現圍村人都唔係咁嘅，我呢個造型係營造一個喜劇效果。
記：染金毛？
馬： 唔係，電髮，電髮易打理。除咗去圍村做資料搜集，其實有四個人，我都需要，周潤發、梁朝偉、周星馳同陳小春，佢哋四個都做過呢類角色，所以我買晒佢哋啲碟，佢哋四個特質都唔同，做衰衰格、爛撻撻嘅角色都做得好好。
學講客家話自創口頭禪
記：喺劇中，你會講客家話，事前搵人教？
馬： 我搵咗大埔區議員陳灶良，佢係圍村人，亦係鄉議局議員，我會將部分想用客家話講嘅對白交畀佢，例如「死蠢」、「係咪想死」，然後我就錄音，一得閒就拎出嚟聽，埋位之前又聽一次，而且我仲設計咗啲口頭禪，「十個衰格，起碼有五十」、「十個開心，起碼有三十」，呢啲口頭禪平時同朋友傾偈都會講。
編劇寫我呢個角色寫得好好，我聽到都覺得好興奮，好似係第二個嘅自己咁，排戲嘅時候，都忍唔住講埋粗口，當然正式拍嘅時候，梗係無啦，我仲成日鬧Ken哥（鄭則士）做死肥鬼，大家真係拍得好開心。
記：你唔係第一次同寵物合作？
馬： 第一次喺《勇往直前》，同馬合作，之後《蒲松齡》就同龜合作，仲有港台有套劇集係講警犬。由細到大我都有養狗，但係七八年前，因為隻狗死咗，所以就無再養，我係好想養，但我無時間照顧佢，我家姐、姐夫又唔得閒，我又唔想爸爸照顧佢，因為要帶隻狗落街嘛！
「阿黃」過分熱情愛舔嘴
記：將來搬間大屋，到時再考慮養番狗？
馬： 我鍾意House，但我又唔鍾意咁多門窗，所以住頂樓複式就最好，因為我係經常檢查門窗有無閂嘅人，如果頂樓咁都被人爬到上去，咪畀佢偷囉！哈哈。
記：同寵物合作，有無難忘事？
馬： 「阿黃」係明星狗，佢之前喺《當狗愛上貓》出現過，佢係女中之女，佢好鍾意男仔，對我特別熱情，好聽話，見親我都會舔我個嘴，其實未拍之前，我去狗房陪佢玩，玩咗好耐，正式合作見番我，佢又認得我，對我過分熱情，所以合作係無難度，拍完到宣傳，已經有兩年無見，但阿黃喺宣傳度見到我，佢都表現得好開心，可能我由細到大都有養狗，所以我身上都有陣狗味，其實狗好有靈性㗎！佢係知道邊個錫佢。
記： 向來飾演斯文角色，但今次爛撻撻角色同以往唔同，不過都受到好多觀眾讚賞，以往接角色嘅時候，會唔會都係以前嘅角色唔同，接受新挑戰？
馬： 我仲有三套劇集《占星情緣》、《誘情轉駁》同《蒲松齡》都未播映，我喺入面嘅角色都係好唔同，我好希望2010 年，接受新挑戰飾演反派角色。
記：你同鍾嘉欣、鄭則士已經唔係第一次合作？
馬： 大家都好有默契，拍得好開心，嘉欣又好乖，至於Ken哥，我好鍾意同佢合作，大家係好好朋友，亦師亦友，我哋成日都有會通電話，上星期先食過飯，所以我個飲食節目《大廚出馬》都會送請Ken哥擔任其中一集嘅嘉賓。
做飲食節目自己請嘉賓
記：所有嘉賓都係你請？
馬： 係，13 集嘅嘉賓都係我請，暫時請到陳寶珠、林
燕妮、查小欣、Ken哥夫婦等等。
記：教人煮潮州菜？
馬： 潮州菜都難煮㗎！滷水鵝片都好難煮，所以我會以廣東菜為主，每集都會有個大廚，然後聽完大廚嘅拿手菜式，我就落手煮，再畀嘉賓試食，不過有集係煮意大利菜，唔緊要啦！我咪乘機偷師，呢個節目係唔會呃人，因為成個過程都會做晒出嚟，依家錄咗頭兩集，幕後嘅工作人員都睇到拍晒手。
記：你有無學過烹飪？
馬： 無呀！都係睇爸爸煮，所以係自學，近幾年我好鍾意喺屋企煮，其實每個人都係大廚，因為調味都會有自己嘅口味。
記：你最拿手菜式係乜？
馬： 無乜特別，樣樣都好平均，但係以中菜為主。
後記
今次同馬仔約會，是他全日由早上7時開始做到晚飯，是最後一個工作約會，很感謝馬仔一點休息時間也給了我們。他回家換了套衫精精神神過來，大家很輕鬆的一齊滾滾吓，馬仔因為怕熱氣，要了芫茜皮蛋湯底，但又好愛吃炸魚皮，只好將魚皮放入湯內減輕熱氣。不過他吃得並不多，平時和他一起吃飯，他都不會吃太多，因為他喜歡少食多餐！
說自己的演出是向很多前輩偷師。
馬仔對不同的角色有不同的感受。
馬仔對發哥演圍頭仔印象深刻。
Ken哥成了馬仔的良師益友。
穿人字拖的馬仔，與狗狗阿黃已變了老友。
與鍾嘉欣多次合作，二人演出早已心有靈犀，好有默契。
周星馳是小馬的偶像， 他看過他所偶像，他看過他所有的電影
芫茜湯底清熱氣馬仔最心水
雪花牛肉是所有打邊爐的主菜。
牛柳粒是馬仔最愛吃的。
炸魚皮成了又平又惹味的食物。
馬仔對打邊爐愛好程度頗高。