「叮噹」林保全走了，兒童節目Icon譚玉瑛被調走，無綫兒童組慘遭連根拔，連播足十年的《放學ICU》也「壽終正寢」。時代越進步，失去的童真越多，往昔童真歲月，只能回味。還記得那些年陪大家跳飛機的怪獸嚴秋華？今日他已變成白髮中年；跟周星馳在《黑白殭屍》鬥爆肚的白殭屍龍炳基，在美國當上食神；還有《閃電傳真機》的唐韋琪、蔡子健、魯文傑和伍文生幾位大哥哥大姐姐，今日都已是年過四十的Uncle、Auntie；三代主持三段往事，都是我們兒童節目快樂印記。
早已各散東西的《閃電傳真機》主持蔡子健、魯文傑、唐韋琪和伍文生，相隔十多年後再次重聚，當年的大哥哥大姐姐，今日都已年過四十，蔡子健轉行做了財務策劃師、去年當上爸爸的魯文傑約滿港視後現於演藝學院修讀戲劇教育碩士課程、唐韋琪開設了才藝訓練中心教小朋友唱歌舞蹈技巧，至於已有三子女的伍文生亦轉行搞飲食。
■四位《閃電傳真機》的主持再聚首，重演當年《鼠洞》環節，其中蔡子健更笑言已變土豪鼠。
四個老拍檔一見面有說不盡的話題，回味着《閃電傳真機》人人爆騷爆到七彩、兒童節目最輝煌的開心年代。子健說：「以前好多外景，介紹香港唔同地方，內容好豐富，好似縮水版《歡樂今宵》，主持轉好多造型，用新人角度睇，係一個好好訓練機會。」唐韋琪亦說：「成個社會好重視兒童節目，當年有個《空中暢遊》環節，俾未坐過飛機嘅小朋友坐飛機食飛機餐，佢哋話原來食飛機餐係咁快！」
■當年一眾主持經常在兒童節目中扮鬼扮馬。
■（左起）唐韋琪、李天翔、伍文生和蓋世寶，由《閃電傳真機》到《至NET小人類》也合作無間，感情深厚。
兒歌頒獎禮難撲飛
當年兒童節目盛事，絕對是一票難求的《兒歌金曲頒獎典禮》。伍文生說：「勁過晒《獎門人》，兒歌頒獎禮一年一次，為咗你嘅細路，你會去撲飛，同埋當年好多歌手爭唱兒歌。」
隨着時代步伐，兒童節目已淪為電視台「例行公事」，製作費龐大的兒歌頒獎禮及外景拍攝早早被叫停。唐韋琪慨嘆：「小朋友返全日制，放學時間根本銜接唔到播放時間。」密集式的功課、補習和手機娛樂，令小朋友睇兒童節目時間大大減少，更重要的，是節目內容已追不上家長所需。子健說：「o依家家長要求又學英文法文日文同唔同樂器，仲睇個叔叔扮細路？o依家節目少咗啲童真，變得現實咗。o依家啲小朋友係都去遊學團啦！」
■譚玉瑛主持的《Auntie烏卒卒》大受小朋友歡迎。
不忿譚玉瑛被踢走
譚玉瑛做了三十二年兒童節目，去年因為電視台要年輕化而被踢出局，跟譚玉瑛曾共事多年的魯文傑實在看不過眼：「佢總有一日會退落嚟，但呢個係咪適當時機我有保留，我覺得唔係咁好睇囉！睇到阿譚喺《東張西望》揸咪牌出街，我真係嬲，以為佢坐枱，唔係喎！有冇搞錯？真係火都嚟，好肉酸！」唐韋琪亦指：「冇咗譚玉瑛好似唔係好習慣，等於香港有啲地方歷史見證情懷，政府突然要鏟走去，感覺唔係咁好，佢嘅存在，有一種精神喺度。」譚玉瑛被踢出局後，無綫兒童組亦慘遭「連根拔」，魯文傑形容為「滅門」，唐韋琪亦慨嘆「不近人情，冇人情味」。
儘管大家不捨，但一刀切，卻是今日要面對的殘酷現實。
嚴秋華大爆怪獸辛酸史
■一頭白髮的嚴秋華為當年扮怪獸冇面見人不開心。
嚴秋華十五歲開始在辛尼哥哥（黃汝燊）主持的《跳飛機》扮怪獸，當年愛搗蛋又調皮的他，今日已是年屆五十六的白髮中年，二十二年前轉行做速遞員，年前擢升為速遞公司總監，事業家庭樣樣美滿。
當年怪獸深受小朋友歡迎，但背後原來有段辛酸史：「嗰時諗嘢好單純，覺得好難為情，唔開心，點解我冇樣見得把聲？但同辛尼哥哥同埋小朋友一齊嘅時間係好開心嘅。我覺得我做怪獸做得幾好?，幾活潑，換咗第個人做可能唔係呢個效果。」
■怪獸跟辛尼哥哥和飛機仔飛機女感情深厚，但近年鮮有聯絡。資料圖片
不合作運動撐辛尼
《跳飛機》越做越紅，各式各樣商品甚至地產商也爭相拉攏辛尼哥哥合作，結果樹大招風，無綫認為辛尼哥哥蠶食公司利益，突然將他踢出《跳飛機》，換上王愛明和黃造時，嚴秋華跟飛機仔飛機女於是玩「不合作運動」宣洩不滿。嚴秋華說：「係有啲唔合作，嗰個月隻怪獸冇咁活潑，好似病咗咁。細個唔識諗，只覺得唔公平，點解唔畀辛尼哥哥做？又唔係做得唔好，如果咁，我哋都唔做啦！」
昔日小朋友放學回家睇電視習慣，已變成對住電腦或手機，連嚴秋華八歲的囝囝亦如是。嚴秋華說：「我個仔都冇睇兒童節目，佢都係返去溫書之後上網睇電腦。」
不少怪獸家長想子女贏在起跑線，但嚴秋華拒絕再做「怪獸」：「我唔想佢學咁多嘢，要留番啲時間去玩，小朋友冇得玩好唔公道，太過強迫對小朋友心智唔好，影響成長發展。我唔會做怪獸家長，唔係學得多識得多就無敵，我個仔兩歲幾，一入學校就喊，離遠見到學校門口喊，去搭車又喊，我話唔好要佢返學啦，嗰啲時間應該喺屋企，等佢舒服過一個好童年。我都同老婆講，係咪想佢早啲讀書早啲出來做嘢養你？唔係使咩咁早讀書？」
龍炳基：星仔同我哋出頭
■龍炳基退出娛圈後當上廚師，曾製作飲食節目並且親自上陣。
五十二歲的龍炳基移民美國轉行做廚師二十多年，因為八十年代拍住周星馳在《430穿梭機》中《黑白殭屍》搞鬼的演出，龍炳基這個名字到今天仍不時被提起。
星爺當年做兒童節目經常爆肚和恰細路，尤其《黑白殭屍》中小肥仔經常被恰，身在美國的「白殭屍」龍炳基在電話中笑說：「星仔唔係蝦佢，係想打佢！個肥仔當時幾紅，冇乜時間畀我哋，加上小朋友工作時間有限制，凡親有佢，我哋就好頭痕，要等佢就佢收工，覺得真係麻煩，可以講星仔同我哋出頭。」
■周星馳當年跟龍炳基演出《黑白殭屍》期間，被指經常恰小演員。
有指星爺無厘頭文化其實源於《黑白殭屍》，龍炳基笑說：「監製要我哋將角色生活化，做番自己，有時見劇本唔係好跟我哋性格，所以對劇本時就改少少啫。《黑白殭屍》其實唔係畀兒童睇，係畀大人睇。做兒童節目做到去到紅館，你話犀唔犀利？」