於今年《香港電影金像獎》中勇奪影帝的梁家輝，曾經是無綫第十期訓練班出身，但從無拍過無綫劇集就已走去拍電影，故此他希望報恩，為無綫劇集擔演重要角色，不過是次合作卻好事多磨，這套由家輝擔戲的警察內部鬥爭劇集原定今年9月開拍，但當時因家輝封金像影帝後片約不斷，而要延期至明年1月開機，無綫為促成好事一於遷就到底，期間更因新劇有家輝參演而吸引到佘詩曼回巢，夥拍苗僑偉（三哥）、林峯等演員，可惜這套重頭劇最終因家輝於布拉格拍攝導演李志毅執導的新片時不慎撞斷肋骨而辭演，頓成泡影。

家輝目前留港休養，他接受電話訪問時多次叮囑記者不要將傷勢消息弄大而嚇壞他的父母，由於家輝並無詳談受傷過程，雖然獲消息指家輝斷了3條肋骨，但他在電話中卻堅稱小事一椿，並指拍劇受傷經常發生，傷勢於月前經已痊癒，但需時休息，加上復工後要還片債，令他沒法接演無綫新劇，他亦感到無奈。他說：「意外係一個月多前發生，已經好番，唔好搞大件事，免得嚇親我父母要佢哋擔心，（辭演無綫劇？）好可惜，其實我已經跟監製、編審、三哥、志偉傾好劇本嘅嘢，去到最後階段，亦好想同三哥合作，最後拍唔到好遺憾，（再合作？）要睇出年流程而定。」

四度奪得金像獎影帝的梁家輝有意返無綫報恩，奈何拍戲受傷令合作未能達成。資料圖片

對家輝未能演出新劇，幫手力邀回巢的曾志偉對此表示不知情，他說：「我只係負責搭路，唔係監製身份，如果真係就會再跟進，家輝之前講過出年要做兩件事，就係做一套舞台劇同演一套劇。」未知是否與早前跟陳慧琳拍攝電影時弄傷腰骨，因而延遲進度有關。

而無綫戲劇總監梁家樹昨受訪時，承認梁家輝因傷肋骨而辭演：「我都有探過佢，傷肋骨要自行復原，辭演的確係可惜，但受傷都冇辦法，健康緊要！（擔心要另覓人選取代角色？）唔擔心，意外冇辦法，現要再傾劇本、人選問題。」

三哥笑言想跟「師弟」再合作，不過早已獲悉對方於布拉格拍電影時斷了3條肋骨，更曾跟家輝通電，知道他因為傷勢而開不到工，一切拍攝的工作也需延遲。至於佘詩曼坦言其實之前一直都不知道此劇男主角是誰，她謂：「之前係梁家樹（無綫高層）問我1月有冇檔期，叫我返嚟拍劇，我應承咗佢，不過演員方面之前一直都話未落實，所以依家有乜演員加入或退出，都唔係一件特別嘅事，總之無論邊個做男主角都會接拍。」又指知道家輝受傷後也感可惜，祝福他早日康復。