梁家輝回歸拍劇 佘詩曼斟做女主角

無綫近年喺一台獨大嘅情況下,節目製作趨向流水作業式,成日俾啲觀眾批評,終於喺受到王維基免費電視台嘅刺激下,發奮搵曾志偉孭飛監製兩套劇,志偉碌晒人情卡搵啲猛人拍,6月底開嘅女人劇《Aerobic Girls》游說過葉玉卿返嚟拍失敗咗,但另一個劇嘅男主角梁家輝依然冇變,落實明年1月拍。

未喺無綫正式拍過劇嘅梁家輝,其實N年前曾經拍過《千王群英會》,同藝訓班同學劉德華一齊做主角周潤發嘅跟班,有場戲華仔做發哥司機,家輝要幫發哥開車門,家輝現貴為四屆香港金像獎影帝,但依然遵守承諾明年1月返無綫拍劇。要配影帝級人馬,一眾無綫花旦當然都想做女主角,但當唐詠詩、馬賽都做到《神探高倫布》嘅女主角,而觀眾都認為未夠班嘅,仲有乜嘢人可以配到梁家輝呢?無綫都知道要襯得起影帝,至少要視后級人馬,所以人選瞄準咗佘詩曼,如無意外,梁家輝同阿佘明年齊齊開工。

梁家輝回歸拍劇 佘詩曼斟做女主角
■曾志偉開劇,搵出爐影帝梁家輝擔正,連阿佘都想同佢合作做女主角。設計圖片及設計對白

梁家輝回歸拍劇 佘詩曼斟做女主角
■梁家輝係影帝級人馬,真係要視后級嘅佘詩曼先夠份量做拍檔。資料圖片

梁家輝回歸拍劇 佘詩曼斟做女主角
■曾志偉(右)曾經游說葉玉卿返港拍劇,可惜失敗咗。資料圖片

梁家輝回歸拍劇 佘詩曼斟做女主角
■梁家輝當年都做過《千王群英會》嘅茄喱啡,

「我會盡力爭取」

阿佘雖然已經唔係無綫親生女,但佢一年仲會為無綫拍一部劇,噚日喺外地嘅佢被問到同梁家輝拍劇時話:「有初步傾過,我都好想同家輝哥、三哥(苗僑偉)合作,睇吓個期夾唔夾到,我會盡力爭取。」