《衝上雲霄II》噚晚曲終人散，大團圓結局，Sam哥同何年希成為一對，CoCo同JimJim又奉子成婚，噚晚令全場觀眾尖叫嘅Issac同夏晨更是眾望所歸，當然唔少得嘅，仲有Roy同Head姐呢一pair。

Cool魔張智霖噚晚喺結局騷話，如果收視有60點，佢就露兩點，法拉都湊熱鬧話露一點，今早十一點，Cool魔已於微博報喜:「昨晚的收視…..沖上雲霄了！」無綫今日公佈收視，噚晚兩小時結局篇，平均收視係38點(即約244萬人次收看)，最高係41點(即約263萬人次收看)。最高收視嗰點係陳法拉同吳鎮宇、張智霖三個喺飛機著陸、分分鐘衝出軌道一刻，法拉五官扭曲嗌:「仲有300米!」嗰段時間。跟住鏡頭一轉，已經去咗胡定欣同羅仲謙婚禮上，之後再倒敘番當日飛機失事時法拉最後一秒揀咗邊個。

《衝上II》噚晚嘅收視成績，可謂破咗今年全年紀錄，早前無綫公佈過2013年跨平台(即計埋myTV)收視率最高首五位戲劇節目，《衝上雲霄II》首周已錄得36.4，即共233萬人次收看。爭議聲加笑聲不絕嘅《老表，你好嘢!》排第二，，電視收視係30.0，在線點收視:4.6，跨平台總收視:34.6，即共222萬人次收看，都唔及噚晚《衝上II》一集平均收視咁高。

至於上周《衝上II》平均收視，平均都有31點(即約199萬人次收看)，比前周升咗1點，最高收視係33點，其中上周五兩小時足本播嗰兩集，即係何年希係咁吵吵鬧鬧，Sam哥話佢冇資格做機師，同埋Cool魔俾梁政珏「跣」嗰兩集，收視由八點半得27點一路升到29點、30點、32點，最後何年希同Cool魔決定留港為自己前途打拚、同埋Cool魔重申自己係一個專業Captain嗰幾場，都有33點(即約212萬人次收看)。

飛機失事呢一幕，成為全晚高潮，收視亦攀升至41點(約263萬人次收看)。