《衝上雲霄II》首周高收視 胡杏兒出場即跌至27點

上周收視終於出爐喇,《衝上雲霄II》即使卡士同主題曲都不似預期,但最高收視達34點,即約218萬人次收看;最低都有27點,即約173萬人次收看,平均收視係31點(199萬人次)。

成個星期最低就係周五晚、第五集第一part,亦即係胡杏兒飾演嘅顧夏晨正式出場嗰part;咁又係,嗰部份靠佢同周志文等一眾飛機維修員孭飛,又真係悶親。

至於第三集陳法拉爆喊、但係喊唔出嗰幕,收視有32點,即約205萬人次收看;第四集吳鎮宇側面食蛋糕回憶Zoe的一切,雖然好戲得多,卻只有30點,約193萬人次收看。但講到最高,都係由鎮宇創出紀錄,首集Sam哥正式出場,就錄得34點收視。

《衝上II》令人刮目相看,黃翠如、黃浩然嘅《師父,明白了》,明代為背景嘅古裝片混入時裝偵探劇術語,首周收視不過不失,比上周《熟男有惑》跌咗2點,平均只有25點,約161萬人次收看;最高28點(180萬人次),最低23點,約148萬人次,同《衝上II》收視真係爭天共地。

至於上周平均收視升幅最大節目,係《星夢傳奇》,噚晚一集講李璧琦同梁烈唯被叮出局,收視達25點,約161萬人次收看,比上周勁升4點。反而《神探伽俐略2》就比上周跌兩點,得13點,約84萬人次收看。

衝上雲霄2、衝上雲霄Ⅱ
胡杏兒飾演嘅飛機維修員甫出場,《衝上II》收視只跌至27點。


上周收視一覽。


噚晚大家有冇俾佢哋悶親?