上周嘅《衝上雲霄II》,有感人位(周一Sam哥遇上同亡妻Zoe一樣樣嘅Summer),有鹽花(成集都冇劇情),有悶位(星期五一集講招募PPP學生)。Sam哥吳鎮宇個人表演場面唔多,Captain Cool亦由Cool魔變風流機長,唔知觀眾是否受落,不過上周整體收視就跌一點,由前周平火均31點(即約199萬人次)跌到30點(即約193萬人次收看)。
上周最高收視,係34點(即約218萬人次收看),不過唔係Captain Cool肉搏場面,而係上周一結尾之前,Sam哥喺離境大堂初遇Summer(胡杏兒),以為對方就係Zoe。呢場戲,Sam哥全靠眼神演戲,超晒班。
至於第二高收視,係33點(即約212萬人次)分別於上周一及周四錄得,但都唔係Captain Cool肉搏,周一係PPP投資者香先生嘅飛行導師喺上空心臟病發、Captain Cool救番佢一命;另一個33點,係喇,係你喇,上周四小儀同Sam哥相睇嗰part,Sam哥金句:「唔係個個男人都咁食得鹹,好傷腎0架。」記得嗎?
咁馬國明同Coffee沙灘胸壓,以及Captain Cool同一日(即上周二、23號)兩場出浴及床戲收視呢?馬明嗰場,陰功,得26點,即約167萬人次收看;至於Captian Cool嗰兩場,都係得30點,即約193萬人次收看。周一Captain Cool洗白白冇水,都只係29點(約186萬人次)。
即使網上好多人都讚Captain Cool靚仔過Captain Tong(即Sam哥),但如果收視係反映觀眾選擇(唔排除有人睇完直播再睇myTV 0架),咁觀眾最愛嘅,似乎都係Sam哥。
亞視硬Cut新聞播球賽 收視大拿拿升3倍
怪事年年有,亞視特別多。早前亞視為挽頹勢,買起英超球隊阿仙奴等嘅四場季前熱身賽「亞洲之旅」足本直播,22號(上星期一),仲為咗播名古屋鯨魚對阿仙奴嘅熱身賽,將高收視節目《六點鐘新聞》,由40分鐘,硬cut到得14分幾鐘。
點解亞視進取成咁?因為之前兩場熱身賽,已經令亞視同時段收視升咗成1點!咁究竟名古屋鯨魚對阿仙奴呢場波收視如何呢?埋單係兩點,升咗1點!而星期五(26號)浦和紅鑽對阿仙奴,更加有3點收視,升成2點(即係本身1點),勁升3倍!
唔怪得亞視甘願冒上犯法嘅風險cut新聞啦!需知道根據本地免費電視節目服務牌照規定,持牌機構須於每日下午6點至12點之間,播放兩次詳盡新聞報道,每次不少於15分鐘。
諗諗下,其實《六點鐘新聞》係亞視嘅最高收視節目,冇理由會得1點收視喎!原來佢中間zip咗《ATV焦點》同《經濟快訊》,上星期平均係2點同1點,哦,明晒!
亞視為播球賽,新聞都照Cut!