《衝上雲霄II》終極難題:Sam哥同Captain Cool,揀邊個?

近排娛樂圈最Hit話題,除咗陳茵媺BB性別外,仲有陳奕迅演唱會﹑《星夢傳奇》以及明日開鑼嘅書展等,當然唔少得無綫重頭劇《衝上雲霄II》啦,呢套劇係廣大市民情意結,噚晚首播收視高開,再次成功掀起追劇熱潮,唔睇恐怕會冇話題。

至於網民亦喺facebook及討論區熱烈開Po,真係乜都可以討論一餐,題目亦千奇百趣呀。當然最多人談論話題,除咗係林子祥主唱嘅主題曲外,兩大男主角Sam哥吳鎮宇及「Cool魔」張智霖,亦惹起熱話,究竟視迷鍾意邊個多啲呢?有網民就開咗個「終極難題」:「有可能係史上最難答嘅問題:Sam哥同Captain Cool,你會揀邊個?」

咁呢個又真係幾難揀嘅,手掌又係肉﹑手背又係肉,兩個都不相伯仲,有網民揀Sam哥,因為貪佢男人味勁啲Man啲,冇咁口花花;Chilam就靚仔到暈,但亦有網民抵死話一定會揀林子祥囉!

此外,有網民話一見到Chilam,就話諗佢幾時會同舅父曹查理合作,甚至加埋Chilam表姐上山詩鈉一齊合作就更加好,咁邊個係曹查理?咪就係拍過好多部三級片嗰個男演員囉,當年幾紅0架!

《衝上雲霄Ⅱ》終極難題:Sam哥同Captain Cool,揀邊個?
網民開咗個「終極難題」,Sam哥(左)同張智霖(右)兩位型男,大家揀邊個呢?


又真係幾難揀啵!


張智霖靚仔


吳鎮宇好man

Chilam同表姐上山詩鈉
Chilam同表姐上山詩鈉

Chilam舅父曹查理
Chilam舅父曹查理,有網民希望佢同Chilam合作。