《衝上雲霄II》祝捷會

有幸胸壓張智霖 劉俐飄飄然:真係好益我﹗

無綫熱播劇集《衝上雲霄II》收視報捷,今日張智霖(Chilam)﹑吳卓羲﹑江美儀﹑米雪﹑劉俐及單立文等,出席喺將軍澳某酒店舉行嘅祝捷會,吳鎮宇﹑胡杏兒及陳法拉因不在港而缺席,但佢三位都有錄聲支持,鎮宇話:「估唔到出街一星期就報捷,希望下次報捷我可以返港出席。」

而劉俐喺劇中有幸胸壓「Cool魔」Chilam,劉俐就飄飄然咁話:「真係好益我!當時我好緊張,導演叫我性感啲﹑溫柔啲,但始終我係男仔頭,做唔到咁姣,有冇咀嘴戲我都好滿足。」認真回味無窮!

劉俐仲自爆話身邊有女性朋友羨慕佢,仲話激動到爆粗添,有冇咁誇張呢?


劉俐自爆話好鍾意Chilam喎,呢期邊個唔鍾意/羨慕佢吖?


劉俐(左二)畀仔圍。


傅嘉莉着露背裙現身。


沈大師呀!

重口味! 吳卓羲恨睇張智霖股罅

噚晚《衝上雲霄II》嗰集,「Cool魔」張智霖(Chilam)終於露出鳥,佢只係包住條浴巾走出屋外,期間仲因為毛巾跌下,而嚇親女鄰居添,呢Part收視應該都唔錯啩。

今日吳卓羲(Ron)出席祝捷會時,講到Chilam露兩點兼跌毛巾,Ron亦坦言呢part好吸引,不過佢亦嫌棵植物阻碇,佢笑稱:「如果睇到少少股罅就好喇﹗」估唔到吳卓羲都恨睇Chilam股罅啵。

另外,有報道指劇中有幾個角色名嘅國語發音「唔老利」,吳卓羲就話:「得啖笑,我哋又唔係真係揸飛機。」講到佢唔夠Chilam咁好艷福,吳卓羲解釋:「我角色係上一集順延落嚟,角色唔會花弗。」

至於Chilam同梁政珏劇中有床戰,吳卓羲唔覺意漏口風:「佢(Chilam)同我講過,我聽完冇出聲。」咁究竟Chilam當時拍完呢個場口後,同吳卓羲講過乜?吳卓羲死都唔肯講囉﹗

若然收視好,吳卓羲都唔敢亂許下承諾,佢話:「唔會似Bosco(黃宗澤)話着泳褲,怕講咗唔着,會俾人話反口,自己亦接受唔到,因為有好多腳毛。」另外,噚晚一集平均有32點(約205萬觀眾)收視,最高則有34點(約218萬觀眾),成績相當理想。


吳卓羲同張智霖惺惺相惜。


吳卓羲話唔敢着泳褲慶功,又話自己腳毛多。

劇集紕漏多惹投訴 張智霖:呢個係觀眾特色

《衝上雲霄II》開播僅一星期,雖然被指紕漏甚多,但收視依然標青,而劇中兩大男主角「Captain Cool」張智霖(Chilam)及「Sam哥」吳鎮宇,最受女性歡迎。今日無綫舉行收視祝捷會,講到收視有35點(約225萬),Chilam坦言非常滿意,佢認為仍有上升空間。

劇中Chilam艷福不淺,先後同劉俐﹑陳敏之﹑梁政珏及陳法拉有不同程度嘅親密戲份,Chilam就話最激始終係同法拉嗰場,問到嗰場戲有幾激呢?Chilam話:「嗰時出發去倫敦,有場打野戰場口係最激,不過因為當地太凍,最後移師室內拍攝,其實係意識大膽。」

咁囝囝張慕童有冇睇部劇?Chilam話:「有呀,佢覺得我係一個機師,(睇咀嘴戲?)呢啲小兒科,電視有個標準。(靚靚有冇睇?)有呀,佢覺得我整體演繹好好。」

另外,有指蕭定一開出五千萬高價,利誘佢簽約3年,Chilam依然口密,佢只係話:「我同澤東合約未完,9月先會完,係有好多公司搵我。」o依家角色成功彈出,會唔會叫價高咗?Chilam話:「我又冇諗,我只係諗暑假同囝囝去邊度玩。」

此外,劇集收視雖然理想,但就被網民捉到唔少錯處,Chilam解釋:「拍嗰時有真正現役機師喺現場做顧問,本身唔會教錯我哋,可能大家節奏同處理手法唔同。」對於收到唔少投訴,Chilam笑稱:「咁多投訴係香港觀眾特色,千祈唔好冇添呀。」


張智霖對收視感到滿意,但佢認為收視仲有上升空間。


張智霖話囝囝魔童都有睇佢演出。


Cool魔好型呀。


張智霖笑言投訴多係香港觀眾特色。


米雪及江美儀


豹哥單立文


大合照


Chilam興奮到O嘴!


開香檳喇


吹喇叭