家燕姐揭卡拉之星失蹤之謎
魯振順王俊棠被走數嚇怕

《歡樂滿東華》昨日凌晨順利完成，結果籌得 8千 6百多萬元，近年壓軸環節卡拉之星，以往魯振順和王俊棠皆是台柱落力籌款，但近年及昨晚兩人都未有參與，令環節失色不少，身為「永恒卡拉之星」的薛家燕踢爆因兩人被人走數，被迫自掏腰包倒貼善款，結果心灰意冷大叫怕怕。

無綫舉辦的慈善籌款活動《歡樂滿東華》昨日凌晨順利舉行完成，最後合共籌得 86,888,888港元善款，打破去年紀錄，各藝人歌星落力表演籌款，其中曾志偉和梁漢文表演花式高爾夫及籃球籌得 50萬，視帝黎耀祥和商天娥合唱籌 40萬，官恩娜、陳奐仁加林欣彤，三人合唱為善款進賬 20萬。陳豪輕輕鬆鬆表演用釘打入雞蛋中籌到 30萬等，反而又吊又 fing的張繼聰和江若琳只籌 20萬。

官恩娜前晚以性感打扮為《東華》獻唱，無論歌聲和外表同樣吸引。

家燕姐獲獎盃

問陳豪練習多久？他笑說：「 5分鐘左右，善款都 OK，不過我心目中想籌 60萬。」可能跟緋聞女友廖碧兒同台演出便可籌得更多？陳豪表示：「咁由公司安排。」祥仔則搞笑說：「我哋本身目標係 30萬，睇我同娥姐嘅份量咁重，就知籌得唔會差喇。」
每年東華壓軸籌款節目就是「卡拉之星」，多年來一直大力參與的薛家燕當晚籌到 75萬 8千元，另外她又獲頒獎盃成為「永恒卡拉之星」。

家燕姐多年來參加卡拉之星環節，合共籌到約 300萬，叫座力認真犀利。

魯振順（左）和王俊棠曾大力支持卡拉之星，但先後被人走數，惟有打退堂鼓。資料圖片

家燕姐透露歷年來大約合共籌了 300萬善款，談到之前同樣大力支持此環節的魯振順及王俊棠，近年及昨晚也沒有出現，家燕姐踢爆兩人「唔玩」原因，她說：「佢哋每次都出問題，每次報咗個數，但係之後追唔番，佢哋都俾人走數，結果要自己倒貼，我就好彩，希望答應捐錢嘅人真係要認數。」
多年來有份參加「卡拉之星」的王維德前晚籌到 114,680港元，問到有否試過被人走數？他說：「我通常都係即時收，都有聽聞過佢哋兩個俾人走數，但我就未試過，捐錢時大家都好熱衷，但過咗之後可能搵唔番。」為了參加《東華》，王維德聲稱推了四個工作，合共損失五位數字酬勞。