無綫互動新聞台一眾主播，個個都係俊男美女，小花更是令心動心，單係一個周嘉儀BB，已經俘虜萬少男觀眾嘅心。不過，有美貌有智慧，有使命感，更有事業心。加上主播走吓一個走吓又一個，要上位，照計，唔太難。

未知大家仲記唔記得，《金枝慾孽》第一輯，皇后娘娘陳秀珠將玉瑩小主(黎姿)封為華貴人時，就講過，喺後宮之中，可以平分春色，但唔可以獨佔鰲頭；可以各展所長，但唔可以脫穎而出。呢句話，正正就係講緊得寵並一早獲封為貴人嘅爾淳(佘詩曼)。

後宮爭寵，同辦公室政治都係同一道理。皇后嘅心態，同老闆心態，其實都幾似。事緣有消息話，黃紫盈今次同張文采搞到咁，與此理有關。據知，黃紫盈都頗有事業心，一直希望可以更上一層樓，而且佢外表柔弱，但據同佢合作嘅人所講，真人原來口齒伶俐(或形容之為鐵嘴雞)，要令佢喊，唔容易。

周嘉儀早前爆咗單「大嘢」，震動成個新聞部。知情人士話，當時黃紫盈覺得有機會上位，所以信心十足、以為自己可以坐正。點知新聞部話事人就覺得，為免一人坐大，即係好似《金枝慾孽》咁，於是安排黃紫盈同張文采兩個輪住頂替周嘉儀個位。

黃紫盈想上位，張文采又想唔想呢？呢個大家自己估喇。總之兩女聽講話已經唔妥到出面。冇耐周嘉儀復出，但鬥爭未完，因為無綫最近升咗張文采做高級記者。

兩女鬥法，勝負已分。淚灑人前，原因，原來咁複雜……真係可以拍一套《金枝3》。

周嘉儀被雪，另外兩位當然不想放過大好機會。

高層震怒 明召全體主播開會

未知張文采同黃紫盈「交涉」期間嘅對話有幾多人聽到，可能有人聽晒full version，有人聽啲唔聽啲啦。

總之，自爆出黃紫盈報新聞灑淚單嘢之後，高層震怒，新聞部經理黃淑明更叫齊晒所有主播，聽日(4號)返公司開會。張文采同黃紫盈當然都要出席。

聽日會上會發生咩事呢，大概可以猜想得到。但據知，黃紫盈一哭，得到唔少同事同情，換句話講，高級記者張文采呢….

有指無綫全體主播明天要返公司開會，女主播張文采及黃紫盈會出席。