黃智賢怒插TVB：公理何在！

台慶頒獎禮入圍名單率先曝光！盛傳在《雷霆掃毒》奸到出汁的黃智賢（Ben）冧莊男配角高唱入雲，但十強男配名單連世紀大冷岳華和蔣志光都榜上有名，就是Ben被閹掉，還被安排今天公布男配入圍名單，難怪他慶過辣雞怒罵無綫：「到底公理何在！」

無綫今日官方揭曉《萬千星輝頒獎典禮》十強入圍名單，本報昨日收到可靠消息，視帝大熱林峯、黎耀祥、鄭嘉穎、黃宗澤悉數入圍；視后依然是徐子珊和楊怡困獸鬥，陳茵媺更起孖有份提名最佳女主角和配角。入圍名單看似正路波，但盛傳極有機會再奪最佳男配角的黃智賢，竟十強不入，真係搞到一街都係眼鏡碎。

Ben在《雷霆掃毒》演繹「魔警」潘學禮一角奸到無倫，網上討論區已預計今年「男配」離不開古明華、陳國邦和他三人之爭，Ben大有機會繼去年憑《潛行狙擊》奪「男配」後首次冧莊。可是在率先曝光的入圍名單中，連岳華、蔣志光、林子善都有份，硬生生把Ben閹掉，冇份在今年一人一票的新制度中成為公投候選人。

親揭名單　殘忍無奈

最弔詭是依過往慣例，由去年的得獎者揭曉今屆入圍者，變相令Ben今年落得拍手和戥人高興份兒，記者昨日致電他時，得悉當知道冇份角逐任何獎項，Ben由愕然變得鼓譟：「我真係好詫異，失望當然有啦！我都唔知準則係乜，今年一人一票講公道、講民意，依家我冇份入圍，真係唔知公道何在？如果潘學禮都唔入圍，公理何在？」Ben更反問自己是否已升呢男主角故「被閹掉」，他怒斥：「如果我唔入男配，咁我係咪男主角呢？曾有監製同我講話上年都攞過，今年唔好爭！我覺得視帝都可以冧莊，點解男配角唔得？」他更愈鬧愈慶狂插：「依家將我機會白白攞走，連選都冇得選，連機會都唔畀我，如果同潘學禮呢個角色十強都唔入，我絕不相信，公道？」

子珊驚訝　監製失望

同劇的子珊驚聞Ben冇份角逐男配後即「吓？」一聲，之後說：「點都好，惟有一齊爭取最佳劇集！（會否安慰Ben？）咁大個人唔使啦，前輩嘛，佢明o架喇！」《雷》劇監製林志華對於Ben失落「男配」提名亦失望說：「好愕然同失望，公司選十強嘅機制我都唔清楚，其實大家都分唔到佢喺劇中係男主角定配角，我就覺得佢係男主角，大家都睇到佢嘅努力。獎係重要，但最緊要係公司之後畀乜機會佢！」

香香叫三飛喜出望外

「香香公主」岑麗香憑劇集《巴不得媽媽》人氣急升，獲無綫重用力捧上位，據知今屆無綫台慶頒獎禮上香香更有幸角逐三個項目，包括「最佳女配角」、「飛躍進步女藝員」及「我最喜愛的電視女角色」，得悉入圍的香香大感喜出望外：「自己都冇預料到，因為我仲係新人，有人支持當然開心，有冇獎都好，依家有人支持已經好滿足，拍劇時都冇諗到咁好反應。」香香的「飛躍進步女藝員」對手包括其好姊妹茍芸慧、黃智雯、樂瞳及龔嘉欣；「飛躍進步男藝員」方面則是羅仲謙、梁烈唯、金剛、蕭正楠及王浩信之爭。

無綫台慶頒獎禮提名名單

「最佳男主角」：黎耀祥《大太監》、劉松仁《名媛望族》、林峯《雷霆掃毒》、陳豪《天梯》、馬國明《On Call 36 小時》、黃宗澤《護花危情》、馬德鐘《飛虎》、郭晉安《東西攻略》、鄭嘉穎《拳王》、黃浩然《拳王》

「最佳女主角」：徐子珊《雷霆掃毒》、楊怡《名媛望族》、胡杏兒《怒火街頭2》、米雪《大太監》、佘詩曼《天與地》、陳茵媺《天梯》、鍾嘉欣《護花危情》、陳法拉《東西攻略》、周麗淇《我的如意狼君》、汪明荃《巴不得媽媽》

「最佳男配角」陳國邦《大太監》、岳華《大太監》、王浩信《名媛望族》、林子善《怒火街頭2》、黃德斌《天梯》、古明華《巴不得媽媽》、羅仲謙《On Call 36 小時》、蕭正楠《當旺爸爸》、梁烈唯《缺宅男女》、蔣志光《護花危情》

「最佳女配角」：陳茵媺《大太監》、江美儀《名媛望族》、岑麗香《巴不得媽媽》、黃智雯《缺宅男女》、苟芸慧《怒火街頭2》、胡定欣《拳王》、羅蘭《天梯》、郭少芸《造王者》、簡慕華《心戰》、韓馬利《回到三國》

「飛躍進步男藝員」：羅仲謙、梁烈唯、金剛、蕭正楠、王浩信

「飛躍進步女藝員」：岑麗香、苟芸慧、黃智雯、樂曈、龔嘉欣

而無綫台慶頒獎禮將於下月十七日舉行。