今年無綫《萬千星輝頒獎典禮》將於12月16日舉行，去年視帝視后由觀眾投票直選，結果黎耀祥與楊怡勝出。今年到目前為止，視帝大熱屬《衝上雲霄II》的張智霖及吳鎮宇，而將播放的《法外風雲》中的陳豪與黎耀祥也備受看重，視后則暫屬《巨輪》的鍾嘉欣與《神鎗狙擊》的徐子珊之爭。未料民選只搞一年，今屆無綫就改賽制，將視帝、視后及最佳劇集三項目加評審制度。

有指無綫屬意今年劇霸《衝上雲霄2》的吳鎮宇於十二月中舉行的台慶頒獎禮做視帝，Sam哥唔吼打晒鑼話冇期出席，令一人一票fans多的Cool魔張智霖再被睇高一線；點知綜藝科總監余詠珊話要改制，認為公投冇專業人士評審欠說服力，決定今年加番專業評判。玩到謝！改制變相對fans多的Cool魔不利，上週國慶日到深圳為海航集團晚宴演出的Chilam卻不以為然，Chilam睇得好開：「如果有獎，我當然歡迎，五強都好，但希望TVB早啲度期，我一定盡量到。（改制唔玩一人一票喎！）平常心啦，冇乜所謂。（鎮宇話明去唔到頒獎禮攞獎！）咁我代佢攞！其實其他演員好似馬明、卓羲佢哋都好努力，成套劇（《衝2》）都好有機會（攞獎）。」

無綫非戲劇製作總監余詠珊昨在電話中解釋：「始終想視帝、視后、最佳劇集呢類最佳嘅獎項，加番專業嘅評選，考慮緊組個幾百人嘅專業評審團，或者不設觀眾投票，但獎項名稱會唔會變，仲要開會決定。」不過觀眾仍有機會投票，供票選的獎項會以「我最喜愛」或「最受歡迎」冠名。

玩我咩？（設計對白）
余詠珊（小圖）下令改制，唔玩全民公投，冇晒優勢的 Cool魔國慶日到深圳做活動嘉賓的他回應：無乜所謂。

貴客騷
Chilam是當晚唯一表演嘉賓，唱兩首歌歌酬五十萬，觀眾全是豪宅準客戶，非富則貴。

暈浪
被 Chilam抽中得 iPhone大獎的 fans，上台後暈晒浪，激動傻笑，連 Chilam手上的獎品（黃圈）都唔記得攞。

總裁送機
海航集團旗下有航空、樓盤、飲品及食品等業務，集團總裁親手把海航飛機模型送給 Chilam留念。

人棄我取
為爭取台慶頒獎公信力，無綫最初屬意鎮宇做視帝，可惜早已做咗影帝的 Sam哥根本唔志在， Chilam機會大增。