台慶頒獎禮餘波
阿姐讚陳豪踩林峯

【萬千星輝頒獎典禮之賽後投訴】繼楊怡去年在《萬千星輝頒獎典禮》硬搶佘詩曼的「我最喜愛的電視女角色」被大喝倒采後，無綫前晚又為力捧林峯而犧牲深受觀眾喜愛的《公主嫁到》三駙馬陳豪，將「我最喜愛的電視男角色」夾硬頒予林峯，陳豪則只獲頒被視為豬肉獎的「最佳專業表現大獎」，結果惹來觀眾、網民狂轟，就連一向有碗話碗的阿姐汪明荃，亦為陳豪大抱不平。

阿姐前晚與王祖藍、阮兆祥和李思捷演出完在會展舉行的《荃加福祿壽之宇宙最長演唱會》後，於灣仔舉行慶功宴。談到陳豪前晚只得個豬肉安慰獎，阿姐有點不忿說：「係啦，我幾鍾意陳豪，幾鍾意佢喺《公主嫁到》嘅角色，我都睇咗少少，係另類演出。」那麼，有沒有看「我最喜愛的電視男角色」的林峯演出？阿姐冷淡說：「我冇睇過佢喎。」有否替陳豪不值？阿姐謂：「佢大把機會，我知佢家拍緊新劇都好大突破。」

汪明荃前晚在福祿壽演唱會慶功宴上，為陳豪敗給林峯大感不值。

小美留言撐三駙馬

未幾，英皇的吳雨跟阿姐說：「恭喜漏咗，仲有最佳人氣老母。」聽得阿姐一頭霧水，吳雨遂向她解釋，然後對住身旁的無綫高層樂易玲說：「你係林峯阿媽嘛。」除阿姐外，郭富城經理人小美也戥陳豪不值，她前晚在微博說：「好耐冇睇電視！但個人頗喜歡陳豪所演繹的角色。」

50宗投訴賽果不公

陳豪前晚拿着豬肉獎跟到將軍澳電視城支持他的 fans合照。

被指壯烈犧牲的陳豪，前晚在台慶頒獎禮結束後即第一時間離開，並跟在將軍澳電視廣播城門外等候的大班 fans合照簽名。記者昨日再致電陳豪，提到不少觀眾網民戥他不值時，陳豪說：「結果已經出咗嚟，嘈乜都冇用，都叫有獎攞吖！」
無綫昨日共收到 32宗電郵及電話反映對台慶獎項意見，有 16宗認為《義海豪情》應獲最佳劇集獎， 5宗指佘詩曼在《公主嫁到》中表現突出，應奪最佳女主角獎， 4宗反映林峯不應奪我最喜愛電視男角色。廣管局方面昨日就台慶接獲 15宗投訴，直指最佳劇集賽果不公。
此外，《荃加福祿壽》日前勁玩林峯，但林峯不但未有介意，而且昨日凌晨頒獎禮返家後，再親赴他們的慶功宴。樂易玲昨表示林峯未有介意：「佢明白搞笑節目唔搞嘅話又點笑。」另外，王祖藍昨日則在微博跟林峯 fans道歉。
採訪：李珮洳、楊潔雯
攝影：黃文成、彭琮然

網中吟–網友不忿賽果：要驗票

林峯在前晚無綫頒獎禮中威風八面，先執個 tvb.com人氣大獎，後更揮低陳豪爆冷捧走我最喜愛的電視男角色，威到上宇宙。痛失視帝的陳豪連安慰獎都被掠奪，慘成頒獎禮大輸家。
一眾陳豪 fans隨即在網上發功，狂插頒獎禮造馬不公，反膠超人說：「我戥陳豪唔抵咋，連個豬肉獎都比（俾）嗰條 chok友攞埋！」而希豬則說：「有冇搞錯，我要求驗票！」