無綫同亞視為咗收視調查結果有出入搞到對簿公堂，其中一個爭拗點係今屆香港電影金獎像頒獎禮，無綫公佈得 7點即係 45萬人收睇，但亞視就話有 270萬觀眾睇過。姑勿論誰是誰非，由此可知金像獎始終有一定收視保證。亞視同金像獎嘅合約會喺今年之後完結，到時金像獎當局就會再公開招標，採取價高者得嘅方式出售播映權。亞視好重視呢個頒獎禮，以一個弱台都有 45萬人睇叫做唔錯，所以志在必得。據講之前因陳志雲對呢個頒獎禮唔係好重視嘅關係，至令播映權落喺亞視手中，不過今年六嬸就下令務必重奪播映權。

今屆金像獎星光熠熠，嘉玲同霆鋒奪帝后為亞視贏得不俗收視。資料圖片

有指方逸華下令要奪回香港電影金像獎播映權。資料圖片

金像獎主席陳嘉上（左）今年任期屆滿，聽聞曾志偉有心頂上。資料圖片

金像獎選新主席

據接近六嬸嘅人話，六嬸自己係電影人加上邵氏開始重新製作番電影，如果唔着緊呢個電影頒獎禮就點都講唔通，加上可以截擊亞視呢個高收視保證，所以無綫今年定會重鎚出擊。

當然結果仲係言之尚早，因為擔任金像獎主席嘅陳嘉上今年任期屆滿，係時候要改選。聽聞好多人對呢個主席位有興趣，據知爾冬陞、林建岳公司嘅莊澄同曾志偉都有意思爭呢個位。