誓破祥勝紀錄 峯帝在望
《無綫萬千星輝頒獎典禮》將於今晚舉行,全民投票下,視帝大熱林峯、黎耀祥及馬國明之中,fans最多的林峯近乎冇得輸,但他入直路仍不忘四出拉票望贏面更穩固,更開到口表示係時候得獎!祥仔昨晚則率一眾劇集演員到商場造勢「力挽狂瀾」!視后方面,楊怡與徐子珊仍把握最後機會大鬥法!
萬千星輝頒獎典禮今晚舉行,今年搞噱頭玩全民票選視帝視后,成功引來熱話,亦對支持者較多的小生花旦有利,有指視帝離不開林峯、馬國明及「兩屆視帝」黎耀祥之爭,不過林峯fans最多,足以由將軍澳電視城排至亞皆老街及太子區,視帝寶座志在必得,但他不敢掉以輕心,最後階段仍四出拉票!
被錯認為區議員
林峯前晚為音樂舞台劇《蝦仔爹哋II》擔任嘉賓,出場時唱着歌勁風騷,林建明即攬啜及喪摸阿峯,嚇得他大驚急急以手護陰:「嘩!綵排冇咁嘅!唔好周圍摸!」但他仍臨危不亂拉票:「你有冇投我一票呀?」事後他笑言大戰在即更要積極拉票,並自爆連陳奕迅母親亦不放過:「我同Auntie講記得投我一票,但佢唔認得我,問我係邊區區議員。」昨日林峯與徐子珊及馬國明出席「壓軸全民投票大行動」,眼見大批fans聲援,林峯更開到聲是時候稱帝:「多年來入圍咁多次,都30幾歲,想有啲實質嘢,依家係Good Timing!」其後阿峯到不同電台繼續拉票,非常落力!
黎耀祥昨晚似暗示對視帝不抱太大期望。
一眾《大太監》演員齊撐大結局,表現齊心。
(左起)林峯、徐子珊及馬國明在大批fans的簇擁下更見人強馬壯。
黎耀祥昨晚率一眾《大太監》演員出席大結局活動,更帶同老婆及兒子撐場,於視帝戰前一晚落力造勢,他直言今次角色多演繹正氣一面,若拍續集相信會更有發揮,似暗示對視帝不抱太大期望:「如果繼續拍會拍得更具爭議性,發揮仲大!(今次好易過關?)都幾o架!(聽晚就選緊唔緊張?)緊乜鬼張吖!」
林建明肉緊攬啜林峯。
林峯昨午走勻多間電台,拉票冇停手。
楊怡
楊怡子珊繼續鬥
視后方面,大熱的徐子珊及楊怡昨日繼續出擊爭票,子珊表示近日「寓拍戲於拉票」,已成功向電影工作人員拉到幾十票,問到是否Sure Win?她說:「唔係!有好多變數,所以要爭取每一票。」據知楊怡在喜愛女角色獎中票數被拋離,若失落視后則會食白果,因此她近日積極發功,她昨到大埔出席聖誕活動時說:「希望一陣去勻全港拉票,我係9號楊怡,信心我都有,係差你哋一票。」提到子珊已獲高層兩票,楊怡笑言會叫樂易玲的家人投她一票。
馬國明狙擊最喜愛角色
「我最喜愛的電視男、女角色」及「飛躍進步男女藝員」,由TVB三千多名員工及九大高層投票,一直有指此獎是失落帝后的安慰獎,賽前大熱林峯及楊怡竟未能打入最後階段,兩人稱帝封后的賽果亦呼之欲出!據知,男角色獎以黎耀祥、馬國明及陳豪票數最高,女角色則是徐子珊惡鬥米雪;至於飛躍獎則分別是梁烈唯對蕭正楠、黃智雯對岑麗香,當中以唯唯及黃智雯呼聲較高。不過,九大高層於今晨才投票,且佔總分的30%,足以影響賽果。
馬國明自己也難料賽果。
香香零壓力應戰
馬國明昨日出席全民投票大行動,提到獲網友激撐,他笑認是「男神狙擊林峯」:「今次搞得幾好,成功有Noise,我媽咪話啲父母級觀眾都叫仔女幫手投,所以好難預測賽果!」至於岑麗香昨日出席活動時直認冇信心得獎,反而睇好勁敵黃智雯:「我都投咗票畀佢,因為好鍾意『關二嫂』呢個角色,我冇咩壓力,只期待着得靚靚睇騷。」
藝人版!視帝后心水
新一屆視帝和視后將在今晚誕生,一眾藝人早已紛紛公開心目中的視帝后人選,視后方面楊怡暫以最高票數領先,馬國明和黎耀祥則平分秋色!
馬國明
馬國明
精彩點評:鍾嘉欣:「佢角色一件頭令我回到初戀嘅感覺,少女都好鍾意呢類型名嘅男仔!」
支持者:鍾嘉欣、陳敏之、楊怡、劉松仁、鄭嘉穎、黎耀祥
精彩點評:林夏薇:「佢同之前演出有好大嘅唔同,我會投佢!」
支持者:吳千語、林夏薇、馬德鐘、謝天華
陳豪
精彩點評:陳茵媺:「我有私人理由!」
支持者:邵美琪、陳茵媺
黎耀祥
精彩點評:米雪:「梗要撐拍檔黎耀祥!」
支持者:黎耀祥、米雪、邵美琪、陳豪、陳煒、周潤發
劉松仁
精彩點評:鄧萃雯:「老友黎耀祥拎過兩屆啦,所以希望偶像劉松仁拎啦!」
支持者:鄧萃雯、江美儀
陳茵媺
精彩點評:陳豪:「視后、女配(角)我都投咗佢!」
支持者:陳豪、邵美琪
徐子珊
精彩點評:林峯:「想同徐子珊一齊拎獎,佢嗰陣做毒后,我同佢講諗唔到有人比你更適合!」
支持者:林夏薇、甄子丹、林峯、謝天華
胡杏兒
精彩點評:鄭嘉穎:「梗係同劇嘅胡杏兒啦!」
支持者:鄭嘉穎、周潤發
米雪
精彩點評:邵美琪:「係朋友我都會支持!」
支持者:邵美琪、陳茵媺、廖碧兒
楊怡
精彩點評:周潤發:「我睇好楊怡同胡杏兒,不過我睇好楊怡多啲!」
支持者:羅仲謙、劉松仁、陳敏之、胡杏兒、周潤發、米雪、陳煒、鍾嘉欣
徐子珊大戰楊怡 輪姦鬥咬唇
徐子珊的「一秒輪姦」大戰楊怡「咬唇咀戲」,兩位視后候選人鬥得難分難解!雖然楊怡先奪馬來西亞視后,但子珊則近日四出拉票,為爭視后盡最後一分力。
徐子珊近日密密出席活動搵真錢及拉票。
徐子珊與楊怡兩位無綫花旦,分別憑劇集《雷霆掃毒》及《名媛望族》成為無綫大熱視后,一個以「一秒輪姦」演毒后,另一個就以「咬唇咀戲」令人留下印象。雖然楊怡於月頭率先在馬來西亞的Astro電視頒獎禮開齋奪視后,但子珊卻無懼大敵當前,於剛過去數星期頻頻曝光,搵真錢之餘又身體力行拉票,絕不放過任何機會!
楊怡率先在馬來西亞奪視后,未知在無綫頒獎禮能否再下一城?
邊個贏都服
對於獎項,徐子珊直言不敢多想,她謂:「有邊個唔想攞?獎項係代表認同,個角色有人討論,有人讚已經好開心,如果攞埋獎梗係仲好啦!(周潤發讚你吸毒戲演得好。)有咁有分量嘅前輩留意當然開心,對自己日後演戲信心會大咗。(有冇睇楊怡演出?)都有,咁佢演技不嬲都好,所以到最後邊個贏都好,都會恭喜對方。」
時勢造英雄
對手楊怡亦對周潤發點名睇好表示如同打了強心針,有指今年視后寶座乃她與徐子珊之爭,楊怡表示:「唔好用爭呢個字,獎項冇人有權去爭,你估小朋友搶玩具咩!識我嘅人都知我係乜嘢人,我同子珊都好熟,見到面都唔會尷尬,只係唔會約出嚟。」楊怡同樣認為獎項代表認同及鼓勵,是成長的證據,不過花落誰家,係時勢造英雄,要配合天時、地利、人和,更謂:「我只可以話我想攞,但會平常心,畀到我會開心講多謝,畀唔到都唔會失落。」
文:影視組
攝:李廣成
徐子珊髮型:Maggie Law@Kim Robinson
化妝:Raymond Yip
服裝及場地:Harvey Nicholas
阿佘花最多心機
憑《天與地》角逐視后的佘詩曼,對自己的演出算滿意,她透露該劇算是入行以來,接拍的電視劇當中,籌備工夫做得最多的一次:「要為個角色諗好多唔開心嘅嘢,『作』好多情節等自己投入,好似我同男友以前拍拖幾咁開心,佢屍骨未寒班朋友又點對佢咁……其中有啲細節劇情根本冇交代,但我覺得幫到個角色。」
至於本屆視帝之爭,阿佘笑指林峯與黎耀祥勢均力敵:「祥仔嘅演出唔可以否定,但論人氣,林峯啲粉絲一定落晒力撐偶像啦。」
杏兒唔睇好自己
同樣攞過視后的米雪和胡杏兒,均睇好今年楊怡可以封后,不過楊怡要面對勁敵徐子珊,米雪表示:「啱o架!多啲機會表現實力!不過,楊怡今年就比子珊多一套劇,會着數啲。」
問到子珊狂拉票可覺蝕底?今年有份爭視后的杏兒說:「我冇乜拉呀,上年都攞咗(視后)已經好開心。(睇好邊個封后?)其實個個都好,好難揀……不過都係楊怡啦。」杏兒對於今年無綫新機制一人一票公投,認為自己好彩,因為今年她並非大熱,沒有太大壓力。