話咁快，無綫一年一度嘅台慶就快到，台慶亮燈儀式將會喺下星期五即係10月4日喺將軍澳電視廣播城舉行，今年將會喺七點半進行直播，以往咁多年嚟都係為咗方便六叔邵逸夫，老人家要早食飯、早休息，所以揀下晝進行錄影，但依家唔使遷就時間，就決定當晚做直播。

至於陣容方面，會由行政主席梁乃鵬主持亮燈儀式，鄭裕玲、曾華倩、陳百祥任司儀，藝員就有《巨輪》、《愛．回家》同埋兩套台慶劇《On Call36小時II》、《法外風雲》大晒冷，即係有鍾嘉欣、陳豪、黎耀祥、馬國明同楊怡等，而表演環節，就由《星夢傳奇》最後五強鄭俊弘、陳明恩、羅鈞滿等孭重飛負責獻唱，取代以往啲一線歌星，唔使再俾人話換獎啦！

■台慶亮燈今年會直播，一如以往大班藝員齊集，仲唔使搵一線歌手嚟演出㖭。

加碼送錶

另外，自從「殼王」陳國強入主後，對啲員工疏爽咗，大時大節嘅禮數唔少得，往年台慶都有送紀念品畀員工，不過幾年嚟都係風褸，今年就送靚靚手錶一隻，有金、銀兩色任揀。加埋之前中秋送嘅TVBuddy月餅，11月又繼續有全台盆菜宴，公司份心意重啲，員工都冧啲。

■（左起）姚兵、羅鈞滿同鄭俊弘等嘅星夢幫一唱而紅，孭飛喺台慶亮燈獻唱。

■馬國明、楊怡會同《On Call36小時II》嘅演員齊出席亮燈儀式。

■無綫今年加碼送錶唔送風褸，隻錶都幾靚喎！