TVB群女拉票被宅男圍
Cover Girl：我哋冇咁高貴

無綫香港小姐競選各項活動進行得如火如荼，佢哋旗下嘅《 TVB周刊》又搞咗個 Cover Girl選舉嚟湊熱鬧，噚日班參選女仔去咗旺角鬧市，拎住傳單拉票，一班龍友宅男收到風，準時喺街頭等候，不過無綫都早有準備，安排咗 10幾個保安保護班女仔，但其實都唔使咁大陣仗，因為班 Cover Girl只不過係咁意騷吓條腿，收埋晒事業線，上身全冇睇頭，仲要俾條候選帶遮住個心口，班龍友見到睇怕都好失望。

10號羅伊婷擺 pose時信心十足，估唔到佢會自比不如港姐咁高貴。

一班 Cover Girl噚日喺旺角拉票，吸引大班龍友宅男去影相。

（左起） 10號羅伊婷、 7號許詠媚、 5號陳婉婷及 3號周嘉莉暫時喺網上投票領先。

打底防走光

參賽者共有 10個，但噚日淨係得 9個出現，因為有個病咗，其中 3號周嘉莉、 5號陳婉婷、 7號許詠媚同 10號羅伊婷喺網上投票暫時領先，問佢哋會點拉票？周嘉莉話：「我已經上網呼籲咗朋友嚟呢度捧我場。」陳婉婷就話：「我會即時叫佢哋投我票同介紹自己。」講到喺鬧市做宣傳，怕唔怕俾人抽水？佢哋話唔擔心，因為無綫安排咗保安單對單保護佢哋喎！仲有嚟之前已經做足安全措施，唔會走光，但咁多人保護又點拉票？羅伊婷話：「我哋同港姐有啲唔同，冇咁高貴會親民啲，會同大家影合照同握手。」哈！咁即係話啲港姐高竇唔夠親民啦？