電視廣播有限公司行政主席梁乃鵬今日出席《衝上雲霄II》慶功宴，近期話題當然離唔開王維基及香港電視，港視雖然要裁員，但員工個個都走出嚟撐佢，呢個現象真係喺TVB完全冇見過。

早前有報道訪問過廖啟智，智叔講出好多要點，解釋點解要離開TVB，絕對唔係意氣用事，而係TVB一啲條款實在太離奇太侮辱，點解造成咁嘅局面，都係因為一台獨大。不過王維基出現後，令一班電視從業員有希望，TVB亦好似突然被咬咗一啖醒返啲咁。

今日梁乃鵬喺台上發言，表示喺周日睇咗智叔嘅訪問，即時作出幾個決定，佢話：「會開始培育TVB大家庭文化(TVB family culture)，作為管理層，希望TVB大家庭嘅成員能成為家人而感到驕傲，感覺比人走快一步。

TVB family culture有4樣嘢：第一樣要藝員受到尊重，第二樣要有合理工作時間，第三樣要有合理薪酬，第四樣要有機會演出。

工時方面已出咗通告，依家工時係一更過，每更唔超過十小時，可以加到11個鐘，如果超過11個鐘就要總監批准，拍外景就一更可以超過12個鐘，如拍到14個鐘就要得到監製批准，希望藝人有充足休息，同時依家要求劇本有8成先可以拍一個劇，等製作及編劇有足夠時間，雖然製作成本會增加，但唔緊要，要做好劇集同有好工作環境。」

說到此時，梁乃鵬即激昂咁話：「其他電視台話做到嘅嘢，TVB都一定做得到，而且做得更好，我唔理姓王姓李姓馬姓牛，我肯定我哋會接受呢個挑戰，而且一定做得比你哋更好。」

梁乃鵬今日好激昂咁話:「 其他電視台話做到嘅嘢，TVB都一定做得到。」

對於有指無綫收緊藝員返內地工作？他說：「冇！反而希望加強佢哋喺內地嘅知名道配合TVBC發展。」對於成立星夢娛樂有限公司與星煥唱片合作，強調不會明益「自己人」，對其他唱片公司會亦會公平，保持良性競爭。

講到「愛回家」熱線被指做騷兼抽水，梁乃鵬受訪時話：「我哋係想講清楚，離開TVB嘅同事去咗港視做嗰啲，有啲同事私底下有聯絡，據我所知，製作部同編劇互相有聯絡，藝員就唔清楚。即使未有發牌決定，同事同以前同事都有聯絡，有需要適當時候可以回來，當知道港視有320人裁員時，都係想表達一聲歡迎，呢個行頭來來往往。其實有兩個角度睇，你可以話好似抽水，另一角度係關心，我哋政策係門常開。」有指TVB有內部指引要求藝人回應發牌事件，佢話：「我喺報紙睇到在職人士都有發表，我哋尊重佢哋，香港係言論自由，個人意見唔代表公司。」