被迫做無名氏 海報都冇名

之前王維基重金禮聘無綫一眾綠葉藝人過，如駱應鈞、艾威、張松枝、陸駿光、劉玉翠、冼灝英等等等等。當時有人譏王維基只會請甘草演員過檔。牡丹雖好都要綠葉扶持，噚晚政總上映《半澤直樹》就知道，綠葉有幾正。

其實除咗上述幾位，仲有一個叫朱婉儀，又係講名未必知，一睇樣又係「啊!原來係佢!」2000年落選港姐，演藝學院畢業，被派演角色都係OL、秘書、八婆、鳳姐等、馬姐等等。令人較有印象係《鐵血保鑣》演麥長青老婆曾艷娥。但原來佢都好鍾意玩cosplay，更曾以Cosplayer身份參賽。如今香港電視不獲發牌，朱婉儀亦同其他藝員一樣，一齊上街，留守政總，向政府黑箱作業說不。

咁當日朱婉儀點解要離開無綫？因為兩個字:尊重。日前佢聯同一眾藝人上咗《娛樂審死官》，大談「脫北」心聲，朱婉儀激動落淚，佢話:「最尾一次《巴不得…媽媽》慶功，因為收視都唔差，我嗰次真係忍唔住，我同監製潘嘉德講，我走嘅最主要原因，唔係我做唔到嘢，而係點解解咁多年，我喺呢間公司，我冇見過一張海報有我個名。呢個係一個好好大嘅問題，因為你作為一個藝人，你冇一個名喺張海報度。你知TVB係全球賣埠，我只係想有一張海報有自己個名，但我原來發現，你伙係冇嘅，你係冇嘅，但唔代表我冇喺個劇入面演出……」說時朱婉儀已經哽咽了。佢續說:「點解喺坊間有人識你，但喺自己公司嘅朱海報上從來冇我個名。當時Tommy(梁家樹)都喺度，我同佢哋講，呢個係我走嘅原因。我身為一個演員，我連自己個名都唔可以俾人知道，咁我作為一個演員，仲有乜嘢意思呢？我努力去做一啲嘢，係冇(名)嘅，但係坊間係叫得出你劇裡面個名，話你做得好好，佢哋真係講得出你做過乜嘢劇。」

佢就係朱婉儀，你一定見過佢…如果你睇無綫的話。

「一騷約」每月千幾蚊 冇工開就0蚊

除咗朱婉儀外，有份上《娛樂審死官》大爆無綫如何「善待」員工嘅，仲有同屬港姐出身嘅關伊彤。2002年參選港姐，打入12強。佢比朱婉儀「幸運」一點，因為維基有佢嘅條目；但佢同無綫好多寂寂無聞一樣，接受嘅，係令人頗難堪的待遇。

關伊彤表示，佢係拎埋十年金牌先至走。點解走？因為份約。份約有乜嘢問題？關伊彤話:「TVB有好多種唔同嘅約，我嗰時係一騷約，即係你有工開，就等於有糧出。(一個騷幾錢？)千幾蚊啦。」眾前無綫藝員即大呼:「嘩千幾蚊，好多喇你。你真係好好彩，俾千幾蚊你。」關伊彤都話自己好好彩，因為係港姐出身，自己真係愛上做戲，亦都撐咗五年，但真係撐唔落去:「其實係真係生活唔到，因為……其實你見到……自己有時會覺得……自己咁大個女……」講到呢度，關伊彤已經哭了。

關伊彤續說:「自己咁大個女，我都未仲可以養到我屋企，仲要屋企人支持番我轉頭，我會覺得自己好冇用。呢幾年我係咁裝備自己，你裝備你做得好，我出面好多朋友同我講，你啲戲OK0架，我哋支持你鍾意你，但我唔可以同人講你冇騷就冇錢0架…我一定要有嘢做，先至有糧出。」

直至過檔香港電視，關伊彤謂，佢終於有收入，而且，佢已經組成家庭，亦有小朋友:「我冇奢望自己被捧上一線…女仔係唔襟擺0架，我今年三十歲，我唔介意升級做媽咪，我唔介意做其他角色，主角一定唔係我哋，一定有其他廿零歲0靚妹去做，我惟有自己求進步。呢邊有角色俾我casting，我試過好多次，中唔中都好，我已經盡咗我努力，總會有一日大家會欣賞到我。」

關伊彤喺節目中講到自己反而要家人擔心，即泣不成聲。

2011年情人節，男友林紹奎公開求婚