Face 156期

’10肥雪　好受寵若驚囉！真實對白
《荃加福祿壽》播出至今，收視高企、福祿壽人氣急升，其實攞過台慶最佳男配角獎、扮嘢耍家外，漢堡包嘴阮兆祥唱功一樣了得。

唱得是福

福祿壽爆紅　 TVB幫阮兆祥出碟

2010年05月19日

同四大唱片公司版稅紛爭接近半年未解決，《勁歌金曲》就大半年都係英皇、東亞歌手撐住，晚晚睇祖兒 Twins徐子珊同胡杏兒，唔只你同我悶，連無綫都知唔係辦法。要向人低頭，就絕對唔係大台作風，據知最近無綫積極打造自家品牌 TVB Music，求人不如靠己。
無記搞唱片，除咗頭炮走唔甩嘅巨聲幫，同回收一班外判唱片約即將到期的藝員歌手，本刊獲悉，歌手出身、做福祿壽做到人氣急升嘅阮兆祥，亦有機一圓 22年前歌星夢。

雖則左抄右抄、阿姐汪明荃又被網友圍插，搞笑扮嘢最叻嘅福祿壽，阮兆祥、王祖藍和李思捷終於打破週六晚時段之前一直低收視，做到第 7集《荃加福祿壽》最高收過 30點，勁過平日黃金時段劇集收視。

出身新秀，當年瘦蜢蜢祥仔都以為自己做到張學友，不過唱片失利輾轉入香港電台做 DJ，再入 TVB主持音樂節目，想不到搞笑搞出名堂，兜個大圈又做番歌星。

’87瘦祥
參加過 84年第三屆新秀歌唱大賽（冠軍張衛健）落敗後，一心做歌星嘅阮兆祥 3年後再接再厲參加學友出身嘅十八區歌唱大賽，總算攞到季軍入到行。

21年前林狗嫂合唱
出過兩隻碟， 89年的第二隻專輯《我心深處》仲有當年未出道嘅林狗嫂彭羚做和音，由於祥仔其貌不揚，唱片封套都只影佢側面隱惡揚善。

21年冇出碟，祥仔其實大把機會騷唱功，登台以外， 08年還做埋關菊英演唱會嘉賓，喺紅館舞台獻唱。《忽然 1周》圖片

回收大做

入 TVB Music做揸弗人， Mini當然唔只打造巨聲幫咁簡單，對於一班外判歌手， Mini全部有興趣等到滿約簽番嚟大做：「出面唱片公司幫佢哋行得好好，不過始終經理人公司係 TVB，自己經理人公司拍劇、拍電影再出埋唱片，就更加好啦！」 TVB藝員同外面唱片公司全部只簽兩年短約，等滿約效忠娘家話咁快！

黃宗澤　現屬唱片公司：東亞
Mini評語：「希望大家唔好將佢同林峯比較，我就最想將佢藝員同歌手嘅 image分開做得鮮明啲。」《壹週刊》圖片

林峯　現屬唱片公司：英皇
Mini評語：「佢已經可以喺紅館開演唱會，直情係成功嘅指標，我留意佢好耐啦！」

徐子珊　現屬唱片公司： Neway Star
Mini評語：「佢舊年喺頒獎禮成績好，先聲奪人，跳起舞上嚟好 charming！」

胡杏兒　現屬唱片公司： Neway Star
Mini評語：「佢嘅歌路同形象好 tough，喺樂壇好少有。」《忽然 1周》圖片

鍾嘉欣　現屬唱片公司： Neway Star
Mini評語：「好 sweet好玉女嘅歌路，今時今日好少人似佢咁。」

「吳尊」最掂
唱功重要，但靚仔點都重要啲，有「將軍澳吳尊」之稱嘅許廷鏗吸納最多 fans，仲最受記者歡迎。

高層撐

唔只搞笑功力夠，福祿壽三位能歌善舞嘅一面亦令觀眾有驚喜，連無綫內部高層都發現走寶。
去年 5月正式封咪離開商台，資深 DJ兼填詞人 Mini（夏至，原名蔣冕麗）即時被無綫資源部總監樂易玲招手，最近成為 TVB旗下的 TVB Music揸弗人。一直在音樂台主持音樂節目，又將有個人音樂訪談節目《今日夏至》的 Mini，上週五（ 14日），首次以 TVB Music揸弗人身份出席超級巨聲演唱會綵排，向記者表示對「外判」的胡杏兒、黃宗澤等人有興趣外，更首次披露有興趣發掘新血。

唱片部揸弗人 Mini
除咗做唱片部揸弗人， Mini亦將有類似《志雲飯局》的訪談節目出街：「傾偈之餘亦會融入音樂，已經有好多好朋友應承做嘉賓，落實咗第一集就有阿嬌。」

做過 DJ、形象設計同填詞人，帶住班下月紅館開騷嘅巨聲幫出嚟見記者， Mini果然由訪問、影相甚至衣着執頭執尾，乜都到實。

肥學友

「唔排除會簽 TVB藝員，但係我好留意祥仔。阮兆祥係歌唱比賽出身，出過唱片，幕前經驗同登台經驗都好豐富，我覺得 TVB唔少呢種有實力嘅人可以唱番歌。」
唔講唔知，就嚟 43歲的阮兆祥， 22年前勇奪第二屆十八區歌唱比賽季軍（冠軍李克勤），計落都算第一屆冠軍歌神張學友師弟，出過兩隻唱片添。曾在專訪透露，搞笑形象深入民心再難做回歌星出碟。記者本週一（ 17日）就將有 encore歌星機會的好消息轉告祥仔：「係咩？冇人同我講過呀！家我覺得好受寵若驚囉！做番歌星就梗係想啦，雖然劇集、綜藝節目都要做，《荃加福祿壽》仲話添食，真係要出唱片，我諗實搵到時間出嚟、一定會再畀啲心機嘅！」做劇一早入晒屋，扮「肥雪」又吸納更多 fans，「大 Ex」出碟，實大把人撐！

採訪、撰文：娛樂組
攝影：攝影組