識飲識食的人氣名廚幟哥（黃永幟），繼近日被傳拍攝《為食總司令》時對拍檔高海寧嗒糖後再惹是非，有消息指幟哥自恃人氣升而事事自把自為，在未知會無綫情況下私自邀地產高層老友擔任《為食》嘉賓，藉節目為自己的飲食王國打好關係，結果觸怒無綫高層，將他飛出飲食節目主持之列。

現年 52歲名廚兼飲食集團主席黃永幟為無綫主持的飲食節目《為食總司令》，去年播映叫好又叫座，無綫遂邀幟哥再開拍第二輯並於今年 6月推出。不過，節目播映以來卻是非不斷，有指幟哥對拍檔高海寧嗒糖而冷待陳庭欣，而節目中跟高海寧在越南齊穿比堅尼浸泥漿溫泉而成為網民熱話的「豬扒港姐」陳庭欣，更遭網民狂踩懶音多兼經常搶對白。
唔講唔知，原來《為食》今年初到越南和馬來西亞拍攝外景時，幟哥已多次跟無綫幕後炒大鑊，有傳幟哥自恃人氣升而自把自為兼益自己友，藉節目為自己飲食王國打關係。

高海寧（左）與陳庭欣一起穿三點式享受越南泥漿溫泉，兩人正面交鋒，高下立見。

幟哥被指主持《為食》時對高海寧呵護備至，卻待陳庭欣有如阿四。

改期就老友浪費資源

幟哥在節目中親餵高海寧品嚐美食，令一眾宅男又忌又恨。

據知情人士透露：「幟哥拍第二輯嘅態度同第一輯係 180度變晒，去越南同大馬拍外景，佢成日要人拍佢自己啲老友。有次佢約好咗個嘉賓，隊 crew去到現場個嘉賓甩底，導演唔想浪費公司資源，建議即刻搵第二個嘉賓頂上，點知幟哥堅持唔搵第二個拍，導演最後都肯順從佢意思，改喺第日再拍佢老友，但咁做法已經白白浪費人手資源啦！最慘係幟哥好唔滿意個導演下下窒住晒，返到香港之後，要無綫即刻換過個導演，要脅無綫話唔換導演嘅話佢就唔拍，無綫為咗息事寧人，咪惟有換導演囉。」
知情人士續說：「最尾一集係喺間酒家搵一大班嘉賓出席，點知幟哥喺冇通知 TVB情況下，搵咗某地產公司租務高層出鏡，導演唔肯拍，佢就即刻發脾氣走人話唔拍，搞到一鑊泡。監製賴偉棠知道之後猛同幟哥講數，大概半粒鐘之後，幟哥先至肯再返去現場繼續拍攝，佢個地產高層老友當然冇得出鏡啦。」

李寶安傳召監製問話

據悉，有關幟哥藉無綫節目為自己飲食王國打關係風波，事件驚動了集團總經理李寶安，令他大感不滿，除勒令以後不要再找幟哥主持飲食節目外，原本節目再添食兩集即共 17集的計劃，無綫也即時喊停，提早結束。
就無綫不滿幟哥自把自為一事，無綫外事部副總監曾醒明昨回應說：「事件向製作部了解過，係小風波、小誤會，拍攝《總司令》去到現場，幟哥有個租務朋友喺現場，幟哥話請埋佢出鏡，但按 TVB規矩，出鏡嘉賓事前要經製作部會議通過先拍攝。工作人員去到現場見嘉賓唔喺拍攝之列，婉拒拍攝嗰位嘉賓，幟哥都好明白。至於傳到去李寶安先生度，係因為李生收到報告，佢純粹邀請賴偉棠了解啫，唔係責難。幟哥同 TVB合作好多年，互相尊重，今次只係少少溝通上誤會啫，唔影響將來合作。」

不滿導演亂闖乳豬廠

記者昨日致電幟哥了解，對邀自己友任嘉賓，幟哥否認說：「冇咁嘅事，喺越南同馬來西亞嘅嘉賓全部經 TVB安排，我私下冇搵過任何一個嘉賓。」何以忽然換導演？他說：「我哋拍乳豬廠，要好嚴格 衞生程序先可以拍，間廠係政府嘅，政府安排咗個副市長接待，佢（導演）一入到間廠話：『我唔需要見呢啲人。』之後自己衝入去廠睇景。政府咁樣招待你，你都唔打個招呼，對我哋拍攝情況係有問題 o架喎！佢唔跟人哋 衞生程序，又唔戴口罩，個廠長捉住我投訴，所以我要求換人。」
問到未經無綫同意邀地產高層老友出鏡，幟哥解釋說：「嗰日個經理上嚟飲茶，佢睇我哋拍嘢，我就叫佢試吓（出鏡），佢又好識食，味覺好敏銳，食嘢方面畀好多意見我，我話佢咁識講嘢，不如坐喺度講畀我哋聽。但導演話要報 TVB，我打畀賴生（賴偉棠），賴生話唔得，唔得咪由佢囉！就係咁之嘛。」聞說無綫極感不滿要 cut兩集，及下令不再找他講飲講食。幟哥說：「拍完之後賴生話仲想拍多兩集，諗住去泰國，但後尾佢話冇期，個期要擺港姐同《福祿壽放暑假》。我早幾晚撞到方小姐，佢不知同我幾好傾，邊有不和！ TVB仲叫我諗定明年節目㖭！邊有問題！」近日有指幟哥對高海寧嗒糖並冷待陳庭欣，他說：「仲無稽，全程我老婆跟住！」記者曾致電《為食》監製賴偉棠，但至截稿前未獲回覆。

話你知：出位食神多是非

林澄光

有「少年食神」之稱的林澄光主持的《為食一條街》專介紹平民小食，口碑不俗。不過他後來被指專呃朋友錢，曾向森美借十萬不還，更速食咪神高海寧唱通街，迅速被無綫飛起。

蘇施黃

說話刻薄見稱的蘇施黃所主持的《蘇 Good》觀眾邊罵邊看，收視高開，連主持費亦高企。有指她每集騷錢十多萬，更能跟無綫對分廣告收入以及共同擁有節目版權，結果拍完第二輯被叮走。

李錦聯

無綫廚神李錦聯十分出位，常自認風流表示自己很多女友， 96年跑去拍三級片被無綫雪藏，放生後又被指在節目結束後與安德尊開火推撞被高層照肺，今年初因與女友爭執而高空擲物被判守行為。

我是誰：賭仔翻身變食神

惡搞圖片

黃永幟外號「幟哥」，是現任龍皇酒家主席，亦是香港 10大名廚之一，現擁有 5間酒樓。黃父為香港美麗華酒店總廚及利苑酒家顧問，他做廚師前曾做過泥水扎鐵等工作，後來在廚房由低做起， 85年在利苑成為最年輕的大廚。不過他移民澳洲時染上豪賭惡習，一度負債 2,000萬港元，之後回港戒賭兼努力賺錢還債，終於在 05年自立門戶開酒樓。
幟哥專注發展飲食事業， 05年以顧問身份現身電視節目，夥拍黃麗梅主持了 3個亞視飲食節目而開始為人熟識，之後轉到無綫主持。最近他主持的《為食總司令》更在網絡熱爆，一眾網民似乎妒忌他能與女神高海寧一起周圍去飲飲食食而將他惡搞。