TVB擬搞整容真人騷 邀名人變臉

《盛女愛作戰》和《求愛大作戰》播出後掀話題,傳編導岑應籌備明年新節目,疑構思整容真人騷,她將挑選幾名男女到韓國大變身,全程直擊,為增添娛樂性,不排除力邀一名知名人士參與,曾整容20次的陳莉敏(Queenie)將於節目分享心路歷程。岑應電話中回應一切尚未落實,有進一步消息會再公佈。

無綫近呢兩年製作嘅綜藝資訊節目《盛女愛作戰》同《求愛大作戰》,因為節目中嘅盛男盛女都夠晒騎呢兼出位,所以播映時都掀起城中話題,收視都唔錯。呢兩個節目嘅編導岑應最近又受命籌備出年第三輯新節目,為咗再成城中話題作,佢最近頴爆頭度橋,據知佢o依家其實有兩個構思揀緊,首選係拍攝整容真人騷,次選就係年輕人創業真實個案,但係論八卦同過癮程度,就梗係整容真人騷比較吸引同有娛樂性,至於後生仔創業,內容係好實用,不過放工仲睇呢類要思考嘅題材就會有啲沉悶。

岑應如果真係決定搞整容真人騷,就會帶埋參賽者去韓國由頭執到腳。
■岑應如果真係決定搞整容真人騷,就會帶埋參賽者去韓國由頭執到腳。
設計圖片及對白

其實《盛女》同《求愛》兩輯節目入面,盛男盛女為咗搞靚儀容,都有做一啲簡單嘅醫學美容,所以整容對岑應嚟講,搜集資料方面應該唔算大困難。有指佢有意揀幾對男女素人去韓國進行大變身,全程直擊,等觀眾睇住醜男醜女點樣齊齊變成韓國明星咁款嘅靚人,然後仲會帶出佢哋背後嘅感性故事,同埋探討整容後,面對旁人眼光嘅感受。

《求愛》同《盛女》節目編導岑應
■《求愛》同《盛女》節目編導岑應有意出年籌備整容真人騷。
資料圖片

整容整上癮嘅Queenie,最啱上節目分享整容經驗。
■整容整上癮嘅Queenie,最啱上節目分享整容經驗。
資料圖片

分享慘痛經歷

聽講為咗增添娛樂性,節目入面唔排除會力邀一位知名人士一齊參與,好似整容整上癮嘅美容達人陳莉敏(Queenie),由頭到腳整過20次,佢好大機會再現身節目分享佢喺整容時遇到嘅辛酸同慘痛經歷。到底岑應係咪決定咗搞整容真人騷,係咪都搵Queenie助陣,岑應噚日喺電話中回應:「未定實,有消息先同大家講。」