TVB翻拍周星馳經典劇《蓋世豪俠》王晶捧鄭俊弘做笑匠

王晶早前接受專訪,承認為培育人才將會繼續保持跟TVB合作關係,更自爆今年將會替TVB翻拍經典劇集,據知劇集便是星爺在TVB唯一一套古裝劇,89年播出的《蓋世豪俠》,當年這搞笑劇令星爺彈起。TVB決定有樣學樣,打算捧紅另一個笑匠,晶哥環顧TVB新一代演員,最後決定由《星夢傳奇》一夜成名的鄭俊弘孭飛。

晶哥跟TVB除了合作賀歲片,還剛完成由兩大阿姐汪明荃和趙雅芝合演的電視劇《風雲天地》,早前接受訪問時,也承認還會跟TVB再合作,「今次會翻拍一套舊劇,好經典,不過當年監製唔係我,暫時唔講得,但肯定好爆!」

曾找祖藍思捷

晶哥口中好爆的劇集,就是令星爺走紅的經典古裝喜劇《蓋世豪俠》,該劇監製劉家豪,現在已是nowTV高層。當時星爺的抵死演繹,令觀眾印象難忘,當中有不少他自度的經典對白,譬如「飲啖茶食個包」,更成為流行潮語,這套劇亦是星爺在TVB唯一一套古裝劇,絕對是經典中的經典。

由於《蓋》劇是經典之作,而且星爺飾演的「段飛」戲份由頭帶到尾,TVB最初屬意「王祖藍」和「李思捷」孭飛,但晶哥認為兩人並不適合,更希望在新人中選擇,「晶哥覺得祖藍太矮,襯女主角比較困難,至於李思捷就覺得太老,唔啱呢個角色,反而希望搵啲新面孔。」知情人士說。

TVB提供大量新人給晶哥選擇,最後選了鄭俊弘,「因為TVB同晶哥講,話想捧番啲好似當年劉德華同梁朝偉咁嘅巨星出嚟,所以要搵個唱得又演先得,咁仲有邊個選擇,況且依家樂壇咁低迷,單靠唱歌好難再捧到巨星,一定要拍劇入屋先至夠長遠。」知情人士說。

鄭俊弘昨日出席活動時,對於消息表現得相當愕然,「真係未聽過喎!」即時問身邊經理人,經理人笑笑口說:「未知喎!淨係聽過會幫你度身訂造一套劇,唔知係咪呢套呢?」聽後鄭俊弘表現得相當興奮,「唔敢講做咩接班人,星爺只得一個,真係嘅話我會好努力!」之後還不停笑着說:「呢個消息真係好誇張!好誇張!」看來這次力捧機會,真的令他受寵若驚。

翻拍星爺經典劇《蓋世豪俠》王晶捧鄭俊弘做笑匠

《獅子山下》鬧雙胞

TVB翻拍成風,除了自己經典劇外,原來連港台的經典實況劇《獅子山下》都不放過,更請來該劇鼻祖黃華麒擔任監製,主要演員是胡諾言和姚子羚,不同單元有不同演員加入,暫名《香港心.香港情》。不過最搞笑是其實港台為數碼頻道開台,早已宣佈開拍《新獅子山下》,兩個台鬧雙胞。