《金枝慾孽貳》，作為無綫重頭劇兼「神級」導演編劇戚其義、周旭明離開TVB的最後作品，出街後，可謂「毀譽參半」。「毀」的是，第一集，面對過百萬的「師奶」觀眾，即採取「倒瀉籮蟹」般將十幾廿個主要人物傾巢盡出，其關係之複雜，真係叫班師奶去咗耐啲廁所都唔得，侷住要金睛火眼望到實先知來龍去脈。不過，「譽」的是，今次有「戚周」二人的「金漆招牌」質素保證，好戲，相信一定在後頭。

而無綫今次擺下「重兵」出動到鄧萃雯、陳豪、關禮傑、伍詠薇、蔡少芬、苟芸慧等「投資」在《金2》可謂只許成功，不許失敗。但別忘記：牡丹雖好，都要綠葉扶持。正當大家目光都投在一眾主角身上時，其旁邊的一班演員之演出亦不容忽視。今次《金枝2》有望跑出的，有呢兩位「小宮女」：梁嘉琪及潘曉彤。

拍攝「金」劇多嘢學

劇中飾演「鈕祜祿宛琇」（伍詠薇）貼身宮女的「若葵」的梁嘉琪，拍攝「金」劇今次可謂有如「上課」。她笑說：「對住公司咁多位好戲之人，尤其是鄧萃雯同伍姑娘兩位，真係好多嘢學。而且，今次好感激戚其義同周旭明，就算唔係我有份拍嘅場面，都畀我去現場睇吓人哋點做，對於自己做戲真係好有幫助。」

嘉琪雖然不像潘曉彤般早在《天與地》已同戚、周兩人合作，但對於有傳該劇甚「艱難」，令到「如妃」鄧萃雯拍到「情緒病」，她就表示：「其實大家都難嘅，尤其是主角就更加辛苦，你知啦，旭明又叻，啲古裝對白又長，四字成語好多，仲要好多都未聽過，所以念起上嚟好花功夫㗎！」

享受讀劇本過程

而劇中飾演嘉琪「接班人」的潘曉彤，即表示之前接拍兩人作品時已「領教」過一二：「慣慣哋啦！拍之前要預備好囉，係等個劇本做功課，因為都好深，但係都Enjoin嘅」。

提到拍攝該劇，兩位小宮女更就表示難忘當地的風沙，每每吹得人連眼睛都睜不開，更遑論交什麼表情去演戲。提到嘉琪在觀眾心目中，「主持」形象深入人心，她即扁一扁咀表示：「都想多啲方面嘅嘗試，做主持唔係唔好，可以見到接觸到好多唔同嘢，但都係想做演員多啲，咁當然係慢慢逐步嚟，都想得到嗰方面嘅肯定。」

而向來做開「靚妹仔」的潘曉彤，就表示不介意公司派予的每一個角色：「都係咁去做準備功夫啫，其實我都扮過CID㗎，唔叫做?妹啦！當然係想演多啲唔同角色啦！」

文：占士 攝影：木喜