梁思浩娶翁美玲 岑寶兒嫁鍾保羅

有線娛樂新聞台今朝5點鐘正式收檔，同娛樂台合併之後就正式改名做有線奇妙台。

今日下晝一班主播同節目主持人就頂住大大個太陽坐住開頂巴士宣傳新節目，《怪談》搞咗咁多年，主持梁思浩連出殯都拍過喇，今日佢就大爆為咗谷收視，將會拍冥婚，仲由佢同另一主持阿夢抽簽決定邊個拍。

先旨聲明，唔係導人迷信，但係有線嘅《怪談》拍冥婚，咁兩個主持人都要有個對象架！思浩就話製作隊伍本來打算叫佢娶梅姐，叫阿夢(岑寶兒)嫁俾哥哥(張國榮)，但係佢認為兩位係好多人嘅超級偶像所以反對。思浩仲話曾經接觸過梅媽傾傾，但係梅媽就有某啲要求，所以大家傾唔成，最後就決定思浩同阿夢嘅「對象」係翁美玲同鍾保羅。

至於抽中死籌就嚟「嫁」嘅阿夢就好識安慰自己，佢話鍾保羅當年仙遊時都未娶老婆，今次都算係了佢一個心願，都算係做公德嘅一種咁話。

做宣傳做到咁樣，會唔會過分咗？

湯鎮業轟梁思浩搞冥婚呃神騙鬼

由梁思浩及岑寶兒（阿夢）主持的有線靈異節目《怪談》雖然被指導人迷信，但多年來不乏捧場客，為谷收視，最新一輯在玩無可玩下玩冥婚！

對象分別是85年開媒氣自殺的「歷代最美黃蓉」翁美玲及89年跳樓自殺的名主持鍾保羅（Paul），思浩說：「搞冥婚係高層諗o既，50年來都冇呢樣嘢，我哋計劃一係岑寶兒嫁鍾保羅，一係我娶翁美玲，最後阿夢抽籤輸咗要做，呢個月底會搞，準備Book靈堂喇！」

冥婚構思引來外間狂轟，被批不尊重已故藝人。曾和翁美玲拍拖的湯鎮業身在內地，得悉事件後大發雷霆：「唔只我，一般人聽到都唔舒服啦！呢個題材完全係炒作，呃神騙鬼！佢哋（梁思浩與翁美玲）咩關係啫？三唔識七，為乜呀？收好多錢呀？始終人都過咗身，要尊重人哋家人。佢哋都有好多Fans，有冇顧及其他人感受？簡直係娛樂圈恥辱！」他又斥做節目不應擺死人上枱。問到當年有否打算跟翁美玲冥婚？他表示沒有，認為感情放心中便可。

想幫人完成心願

有線方面則另有睇法，問《怪談》監製佐治會否怕被鬧？他說：「只係想做得更多元化，呈現冥婚呢件事出嚟，我哋係幫人、當功德咁做。（畀人話抽水？）會問准離世家人同意先做。其實Paul有好多心願未了，我哋想幫佢完成心願。」有線高層曾展章亦指製作電視節目會Set底線，但原來是指靠問米：「節目部同事曾通過靈媒了解靈界情況，真係唔得係唔會勉強。」

鍾保羅被「抽水」 盧敏儀斥對死者不敬

鍾保羅與翁美玲生前好友均對《怪談》搞冥婚不表認同。與鍾保羅分屬好友的盧敏儀對《怪談》將故友來「抽水」大表不悅：「我覺得風水神怪嘢都係吹噓，做人應要踏實，我當然唔贊成佢哋搞呢啲冥婚。人已死，死者又唔可以反對，對人家唔尊重之餘亦再揭人傷心事。」曾與翁美玲合作無間的苗僑偉（三哥）亦稱：「我唔明個節目目的係乜！」至於三哥主演的新劇《好心作怪》明天首播，他稱有信心收視好，問到有否咀戲？他說：「周麗淇同我、黃宗澤都有，三個人交叉口水，諗起都核突！」

另外，梁思浩表示曾聯絡梅艷芳媽媽覃美金為已故阿梅搞冥婚，梅媽受訪時勞氣地說：「梁思浩係搵過我上節目，以為講我單官司，點知話要去山頭野嶺拍，我梗係唔去啦！佢哋冇講過冥婚喎，佢哋再亂講，或者佢哋敢搞，我實採取法律行動！梗係唔贊成幫阿梅搞冥婚，佢在生時都唔搞呢嘢。」

金牌司儀傳欠債跳樓

已故藝人翁美玲與鍾保羅於八十年代紅極一時，翁美玲當時是無綫一線花旦，鍾保羅則是著名司儀。1959年出生的翁美玲曾在英國讀書，1982年回港參加香港小姐競選後加入娛圈。1983年，她於劇集《射鵰英雄傳》飾女主角黃蓉一角走紅，成為當紅新星並有「俏黃蓉」之稱，次年她與湯鎮業公開情侶關係。1985年5月14日，事業正如日方中的她在住所開煤氣自殺，終年26歲，有傳她自殺與感情煩惱有關。

原名陳鎮文的鍾保羅於1959年出生，入行初期在電台擔任DJ，及後轉投電視圈，並於1985年加入無綫。備受無綫重用的他，主持《歡樂今宵》及多項大型綜藝節目，被冠「金牌司儀接班人」之稱。1989年9月1日鍾保羅跳樓自殺，終年30歲，盛傳其自殺原因是欠下巨額賭債。

葉世榮籲有線勿玩火

曾被傳與逝世未婚妻冥婚的前Beyond鼓手葉世榮，當年其未婚妻許韻珊，於2002年在家中倒臥浴缸內昏迷不醒，送院後證實不治。原本計劃迎娶女友的葉世榮，在雙方父母同意下，以「丈夫」身份為她設靈，更為未婚妻穿上白色晚禮服壽衣當婚紗及戴婚戒，完成她生前心願。2011年，走出「喪妻」陰霾的世榮，在北京迎娶比他年輕22年的模特兒張偉鈴。

對於已故藝人翁美玲及鍾保羅被擺上枱，昨日葉世榮透過電話回應，暗示有線要慎重考慮決定。他說：「手機、網絡、電視都屬火，過多嘅火會變成火毒，會令人頭腦不清醒，小心錯誤嘅決定。」