最近出鏡率最高的藝人，並非陳豪，也不是翠如BB，而是被網民尊稱為「萬能鍾」的鍾志光。因集多功能於一身，做完主持又拍劇，24小時未停過。現實生活中，鍾仔的來頭更是令人驚嘆，曾為人師表的他，本身擁有人文學科學士、中國語言及文學碩士，以及哲學文學碩士，並非「講波佬」咁簡單。
撰文：何慧斯
人稱鍾仔的鍾志光，對於網民的評價，他日前以分析賽事角度的口脗去說：「網民嘅反應從直觀去睇，好似見我多咗，事實只係最近有好多足球賽事，而且又有劇集出街，做直播節目嘅感覺係強烈啲，加上球賽又係連續做好多晚，所以咪有呢個錯覺，亦係因為呢個原因。我諗喺無綫嚟講，我唔算工作時間長，背後仲有好多負責劇集嘅同事，工作時間比我長好多。」
■鍾志光瓣瓣通，還擁有碩士銜頭，絕對是非一般的講波佬。
攝影：陳志嵐
太監初體驗
印象中的鍾仔的確是瓣瓣通、樣樣掂，閒談入行的經過時，竟然又有另一個驚嘆，他說：「我讀書係讀體育，不過當時好皮毛好淺，所以我入行嘅專業係喺電台開始，嗰陣我係做體育節目，可以話係不折不扣出去跑體育新聞，跟住喺無綫做體育節目，當時亦會有啲足球以外嘅雜項項目，某程度上係一種訓練。」
從體育主持突然兼顧拍劇，原來亦是另一個機緣：「當時拍劇嘅起點係《醉打金枝》，呢個體驗好有趣，劇情有一場蹴踘比賽，監製當時安排咗一個負責講埋波嘅太監角色畀我，呢個角色啱晒我，所以咪幫吓手。當時嘅體驗係辛苦，做直播嘅體育節目好簡單，深夜一點開工，若果連埋加時都係四點可以收工，但係拍劇啱啱相反，差唔多成個禮拜都係朝早零六開工，到傍晚先收工，對我嚟講真係唔係幾慣，不過出嚟嘅反應都幾好，所以我又唔抗拒拍劇呢樣嘢。」
《洲際國家盃》
■鍾志光最近曝光率驚人，從體育節目、清談節目到電視劇集，甚至連遊戲節目都看見其身影，難怪贏得「萬能鍾」威名。資料圖片
《獎門人》
直到《古靈精探》的出現，令他嘗試做醫生和律師以外的角色，他說：「張乾文（監製）畀咗個好得意嘅角色，嗰次佢安排我做一個好鍾意鬧人嘅警司，結果觀眾都好受落，所以跟住搵我做嘅角色都好多元化，呢個係我從體育記者轉去拍劇嘅唔同工種。」他續說：「我成日都同人講，係呢個行業搵我，而唔係我搵呢個行業，喺我o依家嘅年紀睇番轉頭，你會發覺有好多嘢係冥冥之中嘅安排，而唔係我處心積慮去做，行到邊、去到邊，就算係讀書都係一樣，當初我選擇讀師範做老師，過咗若干年之後，有啲同學因為職業需要再讀學位，大家傾開偈，又介紹啲啱讀嘅課程畀我，點知一讀就讀出癮。」結果鍾仔成為人文學科榮譽學士、中國語言及文學以及哲學文學碩士。
最緊要開心
問到鍾仔會否寄望演戲事業上可以再行前一大步，他說：「ＯＫ喇！呢啲我隨遇而安，有得畀你咪做好佢，冇嘅都唔會諗。可能因為讀書嗰陣令我有啟發，某程度心理睇得越嚟越開，好似喺電視圈，大家都知某程度上係爭逐名利嘅地方，但係我一直處之泰然，今日你有嘢安排做，好呀，多謝你！聽日冇晒啲嘢做，咁咪冇囉！我總會覺得，如果我有呢個能力，而你唔搵我去做，呢個係你損失，但係如果有個人嘅能力係好過我，點解你唔搵佢做？呢個世界唔係唯你獨尊，點樣都會變，今日我做足球主播，但係我唔會做一世，我都會離開呢個世界，始終有人做。」
《好心作怪》
《今日VIP》
正因為這原因，他不會因為被讚而飄飄然：「就算你講乜都冇所謂，我都係做番自己嘅，特別o依家批評文化好強，未必人人接受我哋做緊嘅事，任何人對我嘅批評，我會尊重，我亦都會過濾吓你對我嘅批評，客觀公正嘅批評我會接受，亦會去跟進，睇吓係咪可以調校到。」
鍾仔更有感而發地說：「人最重要係健康同開心，健康好難控制，但係開心係可以自己控制，特別喺娛樂圈呢一行，如果你掛住爭某啲嘢，自然會介意人哋點講，但係退後一步睇，因為我唔係一線，我感受唔到佢嘅壓力，只會覺得喺我o依家嘅位置，我相當滿足。」
工作．享樂．讀書
■能將興趣變成工作，還有空閒時間進修，鍾志光坦言很感恩。
以追求簡單生活為目標的鍾志光，為目標生活好好計劃人生，他說：「我將自己嘅人生分咗三部份，第一部份，人一定要工作，做嘢嘅原因就係求生；第二係玩，做人一定要有娛樂，要識得享受，得閒我會搵啲舊同學同老師食飯、傾偈，同屋企人好好相處；第三就係讀書，只要有時間我就會走去讀書，呢三方面就構成咗我日常嘅生活，所以某程度對我嚟講，真係好感恩，我身邊有好多朋友，可能背負住家庭負擔，做一份唔鍾意嘅工作，聽佢哋成日呻喺工作上嘅唔如意，但係每一日都要日出而作，日入而息，講句唔好聽咪叫捱，我自己呢，可以搵到一份同興趣有關嘅工，變咗真係唔覺得辛苦，所以我好感恩，亦可以講話真係好彩。」
因為鍾仔可以將興趣變工作，令他有時間研究學術，他說：「始終我唔係主線演員，拍劇唔會日日要開工，有時可能一、兩個禮拜唔使開工，我可以用呢啲時間，去做啲學術嘅事，所以真係好感恩有一份咁樣嘅工，我有好多同學都好勤力，但係時間比我辛苦，因為佢哋日日都要返工，有啲仲要放大假做功課，人生真係好奇妙。」不過他笑稱不敢跟朋友講，擔心被誤會「晒命」。
■（左起）林敏驄、曾偉忠、鍾志光、林尚義與伍晃榮這個金鑽講波組合，已成為不少球迷的集體回憶。
■鍾志光主持體育大賽經驗豐富，就算跟星級主持同場交手，依然應付自如。資料圖片
■雖然鍾志光拍劇大多演閒角，但亦曾跟不少一線小生花旦交手，於《通天幹探》便跟陳法拉有對手戲。劇照