自98年的《我和殭屍有個約會》，萬綺雯在觀眾心目中就與「馬小玲」同體。去年加盟TVB，拍過《老表，你好嘢！》後，觀眾終於改口叫她「易姑娘」。正當「易姑娘」這個正義社工形象已深入民心時，她卻來個反高潮，在《好心作怪》中飾演為愛情而做盡壞事的大奸角。做反派的萬綺雯，觀眾應該是第一次見；但為了愛而不顧一切的萬綺雯，相信大家都已經十分熟悉。

撰文：Emily Tsui
攝影：Daima
服裝提供：Plotz、Rupert Sanderson
美術：Sing

第一次「偷情」

萬綺雯笑言監製、導演一致認為她對愛的執着，絕對可以套用到《好心作怪》中唐善行這個角色身上。她認同地謂：「無錯，在現實中，我係冇愛就生存唔到的女人，呢點大家都公認。」「唐善行」是萬綺雯入行多年以來首次演的反派角色，她笑稱自己拍了十多年劇，也從未試過跟男主角以外的男演員拍接吻戲。「做了十幾年乖乖女，真係連偷情都未試過！今次《好心作怪》終於有第一次。我會拍呢套劇係因為我從來未做過反派，仲有我欣賞套劇會用唔同方法角度，去拍出人性的真面目。我一直都相信人係性本善，但每個人都會有唔同經歷，好多人為名利逐漸地忘記最初的那份單純，而唐善行就係為愛。」

有人認為做乖乖女易入屋，有人認為做奸角易上位。在萬綺雯眼中，做奸做忠都無所謂，最重要是過程玩得開心。「做乖乖女當然好，主線一定放在你身上。但做奸角可以有無限可能性，因為奸唔會有一個模式。我自己覺得做得開心就得，唔需要衡量邊樣易上位。」

堅守原則

為拍《好心作怪》，萬綺雯獻出了很多第一次，除了偷情，還有第一次拍激吻戲和出浴戲。她坦言答應演出前內心曾經掙扎：「最初知道要拍激吻同沖涼戲，我真係好緊張，但只要唔係為炒作，而係真係幫助到套劇，我都會願意去做。我們在拍攝前已傾清楚所有細節，在好舒服的環境下開始工作，所以拍起來感覺良好。」她還透露原本有一幕游水戲，但後來她因身體狀況問題而拒絕演出。「我真係接受唔到着泳衣出鏡 ，因為當時太瘦， 我驚嚇親觀眾。當時我踩到盡，同一時間拍兩套劇，攰到食咩都唔吸收，瘦到得96磅，所有衫都唔啱着， 所以監製唯一要求就係要我增肥。 」

做好本分，是萬綺雯一直堅守的原則，因此每次演出她都會付出百分百的努力。「呢個係自己的責任， 其他人唔需要去多謝你。每次演出我都希望觀眾會欣賞同享受，只要他們喜歡見到我，咁我就滿足了。」

融入新家

萬綺雯去年加盟無綫，憑着《老表，你好嘢！》成功入屋。過檔後的首部劇集便如此成功，實在很難得。她直言無綫就像個大家庭，所有人對她都非常友善，令她在極短時間內已融入了這個新的「家」。「一開始來到無綫時當然會有少少唔慣，但比我想像中快好多適應。 拍《老表》未到埋尾我已經適應晒，一班演員同事實在太好，我要好多謝他們，就算未合作過的同事都會同我傾偈，畀我好溫暖的感覺， 等我好快有歸屬感。呢種歸屬感對我幫助好大， 等我可以每日在安心的環境演好我的角色。」

她更表示在《老表》時已有感該劇會成功：「其實我好少諗拍完套劇出來會有咩反應 ，我只會覺得如果拍的時候大家相處融洽，感覺良好，就已經係一個好好開始，以我的經驗來說，成功的機會好大。」

老公無限支持

萬綺雯和老公陳十三在10多年前閃婚，二人在最初是不被看好的一對，現在卻已成為圈中的模範夫妻。問到他們倆的相處之道，萬綺雯毫不猶豫地說了一句：「無論做任何事，都係為對方着想，老公想做任何事我都會100% 支持佢。」然後她漸漸道出了二人的恩愛故事：「正如當初老公要返大陸開工作室，其實真係好遠， 但我要照顧一家大細無辦法唔留在香港。但係我都同老公講 ：『我無問題啊，如果你覺得呢個係你的事業， 要離開香港先可以發展， 你就去做啦！』但最後佢都係無去，佢話佢唔想為名利同我分開咁遠，唔想因為任何事傷害兩夫妻的感情，所以決定留在香港。我聽完真係好感動 。」

而更重要的是，她知道老公對自己的支持同樣是無限量的，就像這次在《好心作怪》內的大膽演出，都全靠老公鼓勵才能成事。「拍劇激情場面前我好緊張，食消夜時我即刻打畀佢， 我同佢講我好驚， 好多人望住。佢就鼓勵我豁出去，叫我盡量做好。 可想而知 ，我們都係為彼此着想，無論做咩都唔會傷害對方。」