楊秀惠想全身矯形

楊秀惠、黎耀祥及馬浚偉等昨日到奧海城出席無綫活動。身穿low cut裝的秀惠事業線不夠明顯，她謂：「我心口不嬲都冇，呢排啲o靚模太激，你哋睇得好嘢太多。自己唔夠好，所以收埋。（你平時唔係咁喎！）唔識點答。」

左起：馬浚偉、楊秀惠及黎耀祥穿着整齊服飾出席活動。

秀惠於新劇與舊愛孫耀威現任女友陳美詩合作，問到有否被對方激親？秀惠說：「冇呀！」她又承認以前會加胸墊，現在看情況才戴nude bra，並希望拍胸圍廣告。問到是否想拍矯形胸圍廣告？她稱：「我全身上下都要矯，唔介意有指甲、髮型等贊助。」

同場的黎耀祥正式投入處境劇拍攝，之後以六位數字接拍酒家廣告。馬浚偉則笑言八月是「搵銀月」，故買了iPad獎勵自己。

林保怡忙爆冇煮意

因工作忙碌而無機會一展廚藝的林保怡，最近演出無綫節目《星級廚房》，喜與周中碰頭，大家交流了不少入廚心得，保怡更說：「我只係炒蛋老啫，所以我即刻問周師傅，（其他餸菜都煮得好掂？）唔係話好叻，但我都識煮幾味，只不過長時間都工作，又成日唔喺香港，所以屋企人都係食我工人煮嘅餸菜。」

林保怡跟周中交流入廚心得。

保怡最近中、港兩地拍劇，保怡稱內地拍劇雖然不似香港時間長，但天氣很熱，他說：「我拍外景時，企喺街幾分鐘都可以全身濕晒，氣溫可以高至四十度，幾難頂，所以熱到冇乜胃口食嘢，人都瘦啲，咪當keep fit囉，但我又愛整嘢食，有次見到商天娥，佢出名鍾意食，所以我都會問吓佢啲菜式，自己儲埋唔少心得。」

郭羨妮獲粉絲探班心涼

郭羨妮今年生日要在工作中度過，但她仍不愁寂寞，因有一班來自港、台及加拿大的fans專誠飛往橫店探班，並送贈消暑用品，讓她在近攝氏四十度高溫下仍能涼在心頭！

Sonija與一班忠實fans一齊慶祝生日，並收到好多心意十足的禮物。

郭羨妮（Sonija）最近在橫店拍攝古裝劇，連生日都要在工作中度過，幸得一班忠實fans專誠飛往當地探班，買蛋糕兼送禮物氹偶像開心，難怪Sonija表示好窩心：「十幾個fans專登飛過嚟，除香港之外，連台灣同加拿大都有，真係好感動！其實橫店呢度冇乜嘢買，但佢哋都好叻，竟然買到個蛋糕仔嚟同我慶祝。」

由於當地氣溫高至攝氏四十度，Sonija還要穿上四層衣服拍攝外景，慶幸未有中暑情況，她說：「都係多得班fans夠細心，送咗條冰枕畀我，敷喺條頸度涼浸浸好舒服，仲有熊熊公仔、我嘅Q版肖像公仔、鮮花、蛋糕等，好開心。」

擇偶隨緣

近年鮮有緋聞的Sonija自言仍是單身，並不急於拍拖，她說：「屋企人都冇催婚，之前哥哥結婚，我都好羨慕，但搵男友要隨緣，人大咗冇咁容易對人有感覺。我嘅生日願望係身體健康，雖然老土，但真係好重要，早前爸爸健康出現毛病，搞到胃出血，好彩依家好番。」對於前緋聞男友陶大宇最近有新歡，她一副置身事外說：「唔回應嘞，都唔關我事！」

獲粉絲送上生日蛋糕，郭羨妮甜在心頭。

郭羨妮其中一個夢想是揸飛機，早前終如願以償，並載埋媽媽和哥哥一齊飛上半空。

翱翔天際

除工作外，Sonija早前與朋友到日本大阪旅行，更嘗試揸小型飛機挑戰自己，她說：「呢個係我嘅心願，事前教練同我講解咗五分鐘，其實都唔算太難，我仲同媽咪、阿哥一齊飛，雖然佢哋話揸得好定，但睇得出其實係好驚，哈哈！」