無綫藝員版歌唱比賽《星夢傳奇》已播兩集，不但叫好叫座，亦令不少懷才不遇的藝員得到機會，前晚觀眾見證學聲樂的李璧琦技驚四座，得分僅次於鄭俊弘繼續晉級。不過同一時間，在電視城進行的第三集錄影，李璧琦表現失準意外被out，連同被指內定冠軍、頻頻走音的梁烈唯雙雙出局，李璧琦難接受事實，只慨嘆：「嗰一刻我技不如人。」

鄭俊弘在前晚播映的第二集《星夢傳奇》繼續有好表現，將參賽歌《Angels》獻給已離世的外公，因感情真摯而贏盡掌聲，且再次獲得全場最高的179.5分，至於表演歌劇的李璧琦，女高音一出，令評判葉蒨文亦表示沒資格批評，只說她唱得欠感情，結果李璧琦以174.8高分，第二名出線。原以為超班的李璧琦在下集比賽有機成為最高分得主，誰知前晚錄影第三集時，她表現失準意外出局，令人大跌眼鏡，而她自己亦未能接受事實。

學聲樂的李璧琦在《星夢》第二集獲次名出線（圖），可惜前晚錄影第三集時，以些微分數被out出局。

■沒學過唱歌的何傲兒，對於有得留低感到開心。

「唔識應該笑定喊」

前晚錄影的第三集除鄭俊弘、羅鈞滿、李璧琦和張明偉外，還新加入何傲兒及張振朗，評判團則有譚詠麟（校長）、葉蒨文、李克勤及趙增熹。是夜藝員要唱在座評判的歌參賽，梁烈唯唱《愛情陷阱》，李璧琦則唱克勤的《大會堂演奏廳》。由於前兩集無綫讓傳媒採訪整個錄影節目，致令賽果早被知悉欠驚喜，故前晚只有30分鐘採訪時間，據本報收到消息，前晚爆出意外賽果，被看好的李璧琦表現失準，以零點幾的分數輸掉，與走音的梁烈唯齊齊出局！沒學過唱歌的何傲兒選唱葉蒨文的《情人知己》卻入圍，鄭俊弘唱《愛的根源》再獲全晚最高分。

■為保密賽果，前晚錄影的《星夢》第三集，只安排短暫採訪時間。新加入的參賽者有何傲兒和張振朗。

李璧琦昨在電話中坦言：「賽前特別上咗幾堂學流行曲，比唱音樂劇花多幾倍心血，所以幾倍失望，大家教我擺感情落去，我投入晒，但臨尾前高音部份比平時失準，唔啱音，從未試過臨場發生咁嘅事，一次都冇試過，但一次就得?嘞！當時都嚇一嚇。」李璧琦自認不懂唱歌時將感情收放自如，她相信如普普通通地唱流行曲，就不會有危險。

落敗後，李璧琦有個難忘情景，她說：「啱啱比賽完輸咗，但不斷有人發訊息恭喜，因為電視啱啱播完第二集，正當幾個人安慰時，有百幾個恭喜訊息，我真係唔識處理感受，應該笑定喊、開心定唔開心？只呆咗冇表情，媽咪見到都好驚，當時我冇喊，知嗰一刻技不如人，校長講得啱，比賽係殘忍，嗰一刻係點就點，就算你平時識飛都冇用。」

經過一晚，李璧琦還在整理心情，昨日教唱歌時還要面對一班年長學生，她說：「整理咗情緒至上堂，喺最尾時同佢哋交代，佢哋衝埋嚟攬住安慰，我就忍唔住喊。」雖然鐵定出局，但李璧琦覺得已賺了很多。

人物誌：聲樂導師曾開個唱

■李璧琦前晚錄影前，仍未預計到自己的出局命運。

現年34歲的李璧琦，自小參加音樂比賽贏得無數獎項，畢業於香港浸會大學音樂系，主修聲樂。畢業後，李璧琦身兼模特兒、司儀、唱電影主題曲、廣告歌及配音工作，更在伍樂城的伯樂音樂學院擔任流行聲樂導師，她03年與管弦樂團舉辦首個個人演唱會。後來在一次擔任活動司儀被無綫睇中，正式展開電視演藝生涯。近日有人爆料稱她與編劇李梓樅拍拖，可惜男友人緣麻麻。

唯唯：洗內定嫌疑

■一直被指內定三甲的唯唯笑言輸了比賽，可洗脫內定嫌疑。

同樣出局的唯唯感覺如釋重負，他昨在電話中說：「都大壓力，又要拍劇，就算唔係唱得好都要練至可以見人，仲可洗脫內定嫌疑。」不過他最開心是完成心願，可在譚校長面前又跳又唱《愛情陷阱》，不過卻被校長評他揀錯歌。對於李璧琦亦要出局，唯唯說：「我都打個突，自己出局唔意外，我祝福鄭俊弘走得更高更遠。」沒學過唱歌的何傲兒坦言唱葉蒨文的歌很緊張，對於有得留低感開心。

評判李克勤坦言李璧琦唱得相當不俗：「佢轉唱流行曲其實令我幾意外，好可惜唱最高音部份處理得唔好，感情太投入，最尾部份有少少失誤，扣咗啲分，無奈其他參賽者水平好高，所以以些微分數之差被淘汰，我覺得好可惜。」

連日錄影　歌藝難進步

雖然《星夢傳奇》前晚平均收視跟首集一樣，保持21點（約135萬觀眾）沒有升跌，但卻掀起城中熱話，除參賽藝員表現受注目外，評判苛刻尖銳的評語亦備受關注，其中以巫啟賢評語最狠最辣。由於無綫在首集刪走不少評判對梁烈唯的惡評，遭網民狂轟，並惹來包庇唯唯疑雲，所以無綫前晚不但將巫啟賢斥唯唯獲最低分是「應得」的惡評保留，就連巫啟賢轟無綫放煙效果不當，叫無綫「慳啲啦。」言論亦沒有剪走。

不過，評判部份苛刻評語，對藝員似乎有欠公平，如前晚評判葉蒨文等批評藝員在第二集未見進步，但事實上藝員上月21日錄影完第一集之後，翌日便要參加第二集錄影，試問在不足24小時之內，歌藝又如何進步？加上藝員大都錄影後要趕入廠拍劇，根本分身不暇練歌。另外，節目中刻意大賣香口珠廣告，實較藝員唱歌失準更令觀眾吃不消。