無綫嘅《星夢傳奇》早排選出五強，依名次係陳明恩、鄭世豪、羅鈞滿、鄭俊弘同姚兵，決賽定咗喺本月12、13兩日直播舉行，12號當日10點15分至11點45分，由五強施展渾身解數爭入四強，經觀眾全民投票選出四強後，開始第二階段嘅全民投票，直至13號晚最後一首歌為止，觀眾一人一票選出自己心水，甚至唱埋最後一首歌後，仲可以改變自己嘅選擇。

監製麥鎮東透露，當晚會選出冠、亞、季軍，冠軍得金咪大獎同幾十萬獎金獎品，另由譚詠麟、李克勤、肥媽同巫啟賢等組成嘅專業評判團，亦會選出一個「專業推介表現大獎」，不過為免影響觀眾投票，評判團唔會公開評分。聽聞冠軍除咗有獎金獎品外，仲加碼有無綫即將成立嘅唱片部歌星合約一份㖭！至於投票嘅觀眾，有機會獲得5萬現金同5萬獎品，真係幾吸引喎！

羅鈞滿落力拉票

五強之一嘅羅鈞滿噚日聽到話贏咗有份歌星合約，佢笑言：「我好鍾意唱歌，希望唔好只係簽冠軍啦！」拍緊兩套劇兼要做舞台劇嘅佢，未有太多時間準備，但就希望粉絲會投佢一票。至於粉絲唔多嘅鄭世豪會唔會好蝕底？鄭世豪噚日話唔諗咁多嘢，都係等觀眾睇佢嘅表現投票，總之會集中精神唱好首歌。

■《星夢》五強將會爭做歌神，至於被叮走嘅陳倩揚可以轉做啦啦隊。資料圖片