之前《星夢傳奇》錄影嗰陣，已經爆出咗個鄭俊弘，評判個個讚佢唱得好，就連評判之一巫啟賢聽完之後都話要邀請佢做嘉賓，可想而知，佢嘅表現，確是令人驚喜，噚日(星期日)鄭俊弘出席戒煙活動上，亦應邀唱番兩嘴，唔少藝人好友都鼓勵佢俾心機唱多啲，爭取演唱機會，睇嚟無綫好快就會搵佢唱劇集主題曲。當然啦，無綫依家，唔止缺小生花旦，更缺歌手。你睇前晚《勁歌》優秀選頒獎頒獎俾黃宗澤、再睇睇網上評價，就知。當然，有誠意的話可更進一步，去YouTube搵片睇。係《最後祝福》，唔係同陳奕迅合唱嘅《K歌之王》。
今晚睇無綫播嘅鄭俊弘演出片段，佢選唱咗陳奕迅嘅《時代曲》，有人就話評判過譽，有人話佢聲線特別；不過總括而言，喺今集眾參賽者之中，確實已經係最好。周啟生話佢唱到高音時比較薄弱；葉蒨文就俾最高分，97分，但就提議佢丹田運氣方面可以再改善。巫啟賢俾80分，仲話:「你係唯一一個in the mood，喺隻歌入面，俾晒感情落去。」但就提醒佢，繼續用呢個「發聲」技巧，就好易沙聲。Eric Kwok仲索性叫鄭俊弘唔好做演員，不如去唱歌啦。
至於曾經上過《勁歌金曲》演出嘅梁烈唯，嘩，佢唱陳百強嘅《等》。有聽過嘅，就心中有數…呢首歌，擺明超難唱，但梁烈唯都揀嚟唱，勇氣可嘉；之不過一邊唱，大家一邊戥佢擔心，因為有好幾次，佢都幾乎走音。綜觀現場最多舉牌支持嘅fans就係佢，唯唯壓力，可真不小。獻唱之前，大家都擔心佢是否能應付歌曲尾聲Danny仔越唱越高唱嘅「wo…wo…」，唔使驚，唯唯cut咗冇唱嗰幾句。
明智之舉。至於黃智雯，唱吳雨霏嘅《愛是最大權利》，結果得分包尾。巫啟賢話佢明明係唱中音，但揀錯歌唱咗高音。Eric Kwok更婉轉地暗示，不如你都做演戲吧啦。
噚晚《星夢傳奇》人物兼最高分得主…鄭俊弘。
佢就係鄭俊弘，見到個樣，有印象了嗎？
《法證先鋒2》，飾演蒙嘉慧個細佬。
《大太監》
Eric Kwok﹕「你不如索性轉行，唔好做演員，去唱歌啦。」
巫啟賢要求嚴格，但對鄭俊弘亦讚口不絕。
關二哥關二嫂一齊參賽，結果關二嫂得分包尾。
唯唯唱緊《等》…表情方面，七情上面。
黃宗澤式唱法…合埋眼唱。
關二嫂同張名雅一樣…喊晒。
當然啦，佢得分包尾。
唱吳雨霏嘅《愛是最大權利》…輸咗。