亞視欠薪問題仍未解決，為了盡快揼水出糧，亞視近日決定劈價賣廣告，救亡套餐非常抵玩，只要花三萬元便可播80次30秒廣告，計起來每次才375元。

連王祖藍、蔣志光、韋綺珊、李麗霞（黑妹）等本月30及31日，在灣仔會展舉行的《HEA爆香港演唱會》都幫襯亞視落廣告，祖藍的舅父冼偉智在亞視任職助理副總裁，祖藍這次開騷選擇在亞視播宣傳廣告，擺明曲線撐對家。

《HEA爆香港演唱會》幫襯亞視賣廣告，據知已把宣傳片交亞視明日播出。演唱會出品人王傲山（Marcus）直認不諱，還表示臨時再加碼：「係呀，我哋都幫吓亞視，今日睇咗葉家寶出嚟訪問，我哋啱啱開咗會決定要加碼落多轉，反正都要宣傳啫。我哋開騷主要都係想將歡樂帶畀觀眾，o依家亞視員工冇糧出，大家過年都唔開心，我哋落廣告幫吓手，變相做佢哋『白武士』。如果有一日冇咗亞視，對香港人嚟講係損失同可惜，亞視都係我哋集體回憶，我希望亞視過到呢關，佢哋應會洗心革面做好啲。」

Marcus指這次選擇在亞視賣廣告，是否因為趁它劈價？他說：「咁價錢嘅嘢要問番宣傳人員，不過我睇到報道，佢哋每30秒先375蚊，真係好抵，將來我再搞騷都撐佢再落廣告，加碼買多啲。」Marcus表示這次斥7位數字搞騷響頭炮，他說：「希望大家出嚟都開開心心。」