TVB早已編定吳卓羲(Ron)、陳展鵬及蒙嘉慧主演，2011年的倉底貨《叛逃》（原名《ATF反恐》）食住《衝Ⅱ》優勢播映，卻傳因無綫總監（戲劇製作）曾勵珍陣營的劇集收視連番失手，珍姐系劇集《叛逃》被突然抽起。對於《叛逃》成炮灰，Ron語帶相關笑指陳展鵬累街坊：「我實賴佢㗎，當日傳佢被珍姐力捧加重咗戲份，我冇乜戲份㗎，所以唔關我事！」至於陳展鵬則淡定回應Ron指控：「佢係咁，佢性格好鍾意講笑！」不過，展鵬都以「話中話」回贈阿Ron幾句：「唔好成日講呢啲話題，好悶！」因劇集抽起辣着火頭，吳卓羲、陳展鵬這對「好兄弟」，心病相當嚴重。

曾勵珍陣營劇集《神探高倫布》、《金枝慾孽貳》及《師父·明白了》等收視極差，搞到TVB雞毛鴨血！幸而戲劇製作另一巨頭梁家樹（Tommy）的《衝Ⅱ》能收復失地，Tommy的話事權自動提高，本來TVB已排好陣勢，由珍姐系的《叛逃》承接《衝Ⅱ》推出，但因曾勵珍失勢，除《叛逃》被抽起外，《巨輪》亦被安排在次檔830時段播出，而《衝Ⅱ》後則改由海味及張兆輝主演的《神槍狙擊》接住上；而吳啟華及馬國明的《On Call 36小時Ⅱ》再緊隨《神》播出，兩劇同屬梁家樹出品，可見Tommy一面倒贏晒。

怨展鵬太多存貨

《叛逃》是2011年的倉底貨，當年傳陳展鵬靠冧曾勵珍上位獲力捧，戲份加完又加，惹來「被陪襯」的Ron極度不滿，戲裏戲外都跟展鵬面左左，兩批粉絲因護主更在網上掀起罵戰！《叛逃》被「飛」，「配角」Ron失望中亦不忘大講風涼話：「劇集梗係播晒出街好過做倉底貨，我無乜倉底貨㗎，只得一部同陳鍵鋒合作嘅《肝膽崑崙》，呢部都擺咗6、7年，應該唔會重見天日！其實《叛逃》跟《飛虎》屬同類劇種，當時已抽起過一次，我曾經問過公司，《叛逃》咁好睇點解唔播？TVB同事話陳展鵬有太多存貨，又唔可以撞上下線劇集，要排隊播出，所以今次再做炮灰我實行賴佢，反正傳過我冇乜戲份嘛，（陳展鵬陀衰家？）哈！佢存貨太多囉！」

撐珍姐絕無失勢

陳展鵬對孭重飛的《叛逃》被抽起亦相當失望：「呢部劇有好多爆破鏡頭，對我嚟講係好大挑戰，繼《真相》後最有信心嘅一部戲，最怕到播出時，大家個樣都變晒！我寧可呢部較《巨輪》早出街！」對於吳卓羲怪他存貨太多，累到該劇成炮灰，陳展鵬坦承今年先後播出《心路GPS》同《情越海岸線》，稍後還有《巨輪》，但仍打圓場說：「佢講笑啫，冇針對我成份，我唔係梁朝偉、梁家輝，唔可以話加戲份就加，影響力冇咁大！我諗係公司揣摩緊觀眾對劇集種類喜好同口味，因應作出編排啫，亦唔關珍姐失勢事！事實上珍姐同Tommy製作劇集種類唔同，邊個收視好都值得開心嘅。」

陳展鵬對吳卓羲冇芥蒂，唔介意再合作，不過，對於被捱轟，忍不住「回贈」Ron兩句：「so far我跟同事合作都好融洽，最重要獲觀眾認同，唔係由自己去睇！我唔想再涉及呢啲嘢（是非），都講咗幾年啦，呢啲話題好悶！ 唔好成日講！同我合作過嘅演員，都冇呢啲問題出現過！」

電視撈飯：不值偶像淪大茄
吳卓羲粉絲借亞視網投訴

■吳卓羲同新人劉恩希配成一對，惹來唔少卓羲fans不滿。資料圖片

做藝人最幸福嘅事，當然係賺到錢之餘，仲可以有班忠心fans支持，好似吳卓羲前排幫王心慰監製嘅無綫新劇《忠奸人》試造型，喺劇中佢同郭晉安擔正做男主角，本來一直相安無事，不過呢幾日有啲fans喺討論區為偶像抱不平，不過唔知係咪啲fans嬲得滯，竟然將話題擺咗喺亞視嘅討論區，而唔係喺無綫官方討論區。

個fans話：「未試造型之前就呃吳卓羲，指他是和郭晉安擔正男主角，主角序更以郭晉安、吳卓羲、田蕊妮……騙他來演出；到了8月1日試造型時，主角序就已經要調轉嚟寫了，主角序改郭晉安、田蕊妮、吳卓羲……吳卓羲由第二主角跌落第三主角位。」

Fans續指：「吳卓羲全劇只是配不為人識的新人劉恩希，反而為人熟識的女配角李亞男、楊秀惠就留給陳智燊、張繼聰配襯，令人感到吳卓羲不受重用，其角色亦不會是主角，因為吳卓羲連女配角李亞男或楊秀惠都冇資格襯，更屈居在陳智燊、張繼聰之下配戲。到播出之時，有好大機會把它由《忠奸人》改為《雌雄忠奸人》，由郭晉安、田蕊妮兩人擔大旗演出，吳卓羲這名正義警察就由頭忠到落尾為配線，可能連海報企在後面做佈景板的資格也沒有呀！」

王心慰派定心丸

監製王心慰噚日喺電話哈哈大笑話：「點會唔係男主角？我要澄清，卓羲係男主角嚟㗎，《忠奸人》係講一個忠一個奸，忠係卓羲、奸係郭晉安，佢啲fans真係好愛錫佢，唔使驚，我王心慰都好錫吳卓羲嘅。」

■郭晉安同田蕊妮俾網民指為《忠奸人》嘅主角，變相將吳卓羲降呢。
資料圖片

■吳卓羲嘅粉絲喺亞視官方討論區，炮轟無綫對吳卓羲不公。

講到搵咗個新人同卓羲有感情線，王心慰就話：「我哋想搵個生面口、純到冇人有嘅女仔，因為好多藝人太艷麗，我又唔係好想，嗰個愛情戲係副線，只係助長而唔係愛情劇，如果我做愛情戲畀個咁嘅女仔佢，就噬我啫！」