祥仔唔認命 努力拉票
黎耀祥、林峯今年分別以劇集《大太監》、《雷霆掃毒》角逐視帝，獎項都被指乃二人之爭，二人坦言都有信心，但對早前有指今年無綫一人一票選舉，乃希望造就林峯奪獎，林峯無奈稱被抹殺用心演出；祥仔亦不諱言一人一票令候選藝人更緊張，自己也會繼續拉票！
林峯及黎耀祥（圖）被視為今年台慶「視帝」獎項之爭人選，二人均表示有信心。
今年無綫採取一人一票投票形式選出觀眾心目中視帝，可說是黎耀祥與林峯之爭，有指林峯多後生fans，故票源理應較着數，不過祥仔坦言並非必然，更有信心與林峯一鬥：「有啲中產階級、專業人士可能會投馬國明呢！佢喺《On Call 36小時》個角色都非常討好，所以我覺得今年呢個一人一票機制好好玩。」問是否真的覺得會公平，祥仔謂：「呢個世界冇公平，乜嘢遊戲就跟乜嘢規則。一人一票最大優點就係計觀眾民意而唔係計收視，真真正正由觀眾投出嚟。以前公司高層投票選出，唔到你拉票；依家得獎就只有一個理由，就係觀眾鍾意你，身為候選人都會更緊張，我亦會繼續拉票。」
林峯
林峯被指擁有多fans故較着數，更有指一人一票乃無綫造就他奪視帝，林峯回應說：「fans支持偶像好正常，但每次演出我都好用心，絕對唔係hea，咁講會抹殺演員嘅付出。（咁你想唔想攞視帝？）既然攞唔攞都畀人講，咁梗係攞咗先，我都覺今年一個好嘅timing。」
相信能打動觀眾
至於祥仔擔演的劇集《大太監》播至台慶前夕，祥仔被問到覺得會否更有優勝？他坦言：「兩睇啦！每年梗有一啲着數，一啲唔着數，以前話早播唔着數，但有一樣嘢，如果近台慶，有少少乜嘢瑕疵又會畀人挑剔。」問他覺得《大太監》是否真的能打動觀眾投他一票時，他說：「我有信心，因為套劇不同時段都有感動位，我睇番都好感動。」不過，若要撇除自己而選今年心目中視帝，祥仔坦言也看好林峯：「佢開始成熟，有自己一套獨特嘅風格，呢樣嘢係林峯好成功之處。」
嘉穎偏心馬國明
「視帝」競爭激烈，「過來人」鄭嘉穎和陳豪感受至深，二人對今年爭獎沒甚信心，嘉穎還笑言是戥人高興的一年，他說：「『視帝』呢個獎今年我都係戥人高興咋……咪當支持兄弟囉！其實個個都有機會，黎耀祥就唔使講，年年都熱門，仲有林峯呢！不過偏心啲講，就梗係馬國明啦！佢等《On Call 36小時》呢個劇好耐，加上佢剛喺馬來西亞贏得『視帝』，所以我貼佢！」
鄭嘉穎直言希望馬國明能奪視帝。
陳豪志在參與
至於陳豪同樣稱今年志在參與，問這樣是否更輕鬆？他說：「我年年都係咁輕鬆！其實我對獎項唔太看重，亦贊成一人一票，愈多人參與愈好，以前有電話投票我都好支持。（睇好邊個攞『視帝』？）向來都係黎耀祥，今年都一樣！」
陳豪
馬國明
松哥倡分兩組頒獎
憑《名媛望族》角逐「視帝」的劉松仁，演技已是毋庸置疑，難怪他經已看淡獎項得失，對於是次的「視帝」一獎，更早已聲言「捨棄」。
劉松仁
頒獎禮愈見逼近，松哥更加沒有信心，認為頒獎禮是年輕人世界，他輕鬆笑說：「我就冇啦……我選我個仔馬國明（《名》劇內兩人飾演父子）！畀我揀都揀個後生啦！不過，就個人意見，頒獎禮最好分兩個組別，一個係專家選，一個係公開投票就最全面喇。」