無綫前助導（PA）偽文豪收起「必要的沉默」，出書大爆無綫黑幕，書本未見街，爭議已四起，先有王晶在微博狠批他「唔捱得」，繼有無綫自製「教育電視式節目」講解做PA的苦與樂。偽文豪一直隱姓埋名，朋友稱他文豪或豪仔，昨日他接受本報專訪時終現真身，三十歲的他一臉自信，不怕得罪人及被起底，亦不擔心前途受阻：「我靠才華㗎嘛！」
記者：記 偽文豪：偽
記：點解要隱姓埋名唔用真名？facebook都只見到你半邊面？
偽：文人嚟㗎嘛，梗係用筆名啦，唔係都唔會叫自己做偽文豪咁搞笑。你話用真名唔係唔得，遲早有一日會有人知道我真名，但你叫我講我又唔鍾意呀。哈哈哈！我幅相都畀你哋翻loop咗好多次，嗰個都係我。
記：07-08年，做無綫助導係你第一份工作，係咪太辛苦好多嘢想要發洩？
偽：係我客觀觀察到嘅嘢，只係想分享經歷，本書好壞都有，但正面就少啲（偷笑）。大家可以當小說咁睇。裏面由我入去開始寫到點解要走，有晒起承轉合，唔係話第一篇嗰個人對我唔好，第二篇嗰個人對我差，咁冇意思，亦唔會睇得開心，大家當頑童歷險記去睇會開心啲。我講嘅嘢係其實發生過嘅嘢嘛。
三日冇返屋企瞓
記：你驚唔驚你書入面影射嗰兩個藝人（即吳卓羲和林峯），見到面會尷尬？
偽：唔係驚，但實尷尬。其實我對佢哋冇乜嘢，當然佢哋o依家會憎我。其實我喺本書度有讚林峯㗎！當然，吳卓羲我真係唔鍾意佢，但呢個世界上，你總有啲人係你唔鍾意啦！佢都唔需要鍾意我㗎。
記：當初點解又要入行？
偽：一直好想做創作，我都有好多仰慕嘅導演，好似杜琪峯、韋家輝咁。其實做PA（助導）之前都知辛苦，但冇諗過環境真係咁惡劣，我試過三日冇返屋企瞓，TVB有休息室畀你瞓，裏面有床鋪，但唔知幾耐冇洗。我又唔慣有人喺你隔籬扯鼻鼾，寧願自己帶睡袋匿喺辦公室瞓，但其實唔得㗎。
記：有乜促使你離開？
偽：有啲人話捱多一個月先啦、捱多一年先啦，咁冇意思，做到你唔想做咪唔做，我冇傷害任何人，我自己決定。嗰刻覺得份工冇前途，聽講以前啲叻人三年可以升做導演，o依家可能要八至十年都未得。我聽朋友講，之前港視挖角，TVB寧願搵番好耐冇做、轉揸的士嘅前導演回歸，但都唔肯升個做咗十年八載嘅PA，真係好奇怪。加上現今娛圈太狹窄，做電視嘅導演出唔到去電影圈搵食，電視業又寡頭壟斷，唉，老生常談，都唔使睇我講。
記：咁大膽出書爆無綫黑幕，驚唔驚得罪人？
偽：都得罪咗啦，但我諗唔使驚嘅，香港係法治社會嚟㗎嘛。我靠才華，人生係冇乜嘢需要驚！
記：家人擔唔擔心？
偽：少少啦，最好唔好提佢哋，o依家騎虎難下。
記：怕唔怕將來好難係呢行立足？
偽：我做緊《100毛》編輯，o依家只係普通寫嘢仔箒。唔諗咁遠，有乜做住先，過埋今日先講，哈哈，最可貴係活在當下，你成日諗過去、未來，你做唔番你自己，你要focus呢一刻。如果真係要講將來，我想做一個偉大作家，唔偉大都唔做，希望做得出色嘅時候就好似陶傑咁拍齣戲。
記：有冇考慮將來返無綫工作？
偽：去到呢個地步冇乜可能，除非有日TVB改邪歸正，但呢日好似狂派永遠係狂派，博派永遠係博派，我係對事唔對人，TVB Buddy應該明白。其實我最希望TVB改善對員工福利，對觀眾好啲，為觀眾着想，做啲觀眾想睇同高質素嘅嘢，照計有能力咁做。
捱得唔同唔想捱
記：網民對你評論有正面、有負面，仲有人話你係儍仔，介唔介意？
偽：我至今未做過呢樣嘢（儍仔），我諗冇人話鍾意聽，你可以話孫中山都係儍仔，林肯都係儍仔啦咁樣，蘇格拉底都可能有人話佢儍仔，因為佢哋都會做一啲人哋覺得好儍嘅事。
記：王晶都批評你唔捱得。
偽：係，唔緊要。俾人話梗係會唔開心，我哋呢啲80後全部飲晶哥奶水長大，我又唔好意思狠狠咁批評佢，但我又想回應呢件事。其實佢哋要分清楚，捱得同想唔想捱係兩樣嘢，我捱得都可以唔捱㗎，我點解一定要捱先？一代比一代係冇意思，因為上一代一定辛苦過呢一代，唔通王晶老竇同王晶講：「嘩，搞錯呀，你咁舒服，我嗰時唔係咁。」世界唔係以前咁樣，唔通我哋又講番秦朝，嗰時邊有車搭，要行一公里路，咁比咪冇意思囉。
記：點解搵陳志雲寫序？
偽：我淨係電視見過佢，做《100毛》時亦電話訪問過，佢好nice，佢連我乜樣都唔知，唔知我咁靚仔，哈哈哈！我亦有搵過王維基先生寫序，但可能佢係大忙人，冇留意我小小留言訊息，但我真係好支持佢，好有熱誠搞好電視。
記：覺得本書賣唔賣得？
偽：賣得嘅……應該，點會唔賣得吖。我比較擔心之後寫啲乜箒。本書聽日（今日）港島區可能有得賣，正式發售就下星期一。雖然部份係以前facebook寫，但作為有誠意作者，我都花咗幾個月時間重新雕啄過，其實我比較尊重啲讀者，我將佢哋放第一位，唔係將藝人幾差幾差放第一位，我想讀者睇得開心，本書好好笑，有笑點夾雜辛酸史。
「論點無懈可擊」
記：你係咪自信心爆棚？
偽：有朋友咁講，都冇所謂，當你批評一個人自大，你要知道嗰個人有幾多實力。所以我會叫嗰啲話我自大嘅人，去諗吓究竟佢知唔知我有幾多實力先啦！過份自信唔代表唔聽人意見，如王晶先生講意見我會聽，但有時啲意見，唔係好work。有用嘅意見要聽，但我o依家係作家，好猶疑就冇說服力。我決心做一個作家，就要有自己睇法，其實我平時待人接物好謙厚嘅，通常人哋叫我做乜我就做乜，好似狗仔咁好聽話嘅。不過你問我對呢件事有乜睇法，我覺得我嘅論點係無懈可擊。佢哋道理上係唔可以完全擊倒我，而我係完全擊倒佢哋。
記：係咪好受女仔歡迎？
偽：（昂頭自信）如果話我有好多女，啲女就唔鍾意我，但我會話我鍾意啲女都會鍾意我，過份自信一定有啦！都試過有男仔約我去街。但其實我讀書麻麻，唔係嗰啲傳統意義上面嘅叻人，我一向係革命份子，思想反叛，唔鍾意聽人哋講，我都有自己嘅諗法。一睇我就知唔係啲乜優異嘅人啦，亦都唔需要得到佢哋嘅認同。
偽文豪又有料爆
八婆蜂屈人（暗示陳鍵鋒）
「人哋話佢唔鍾意女人……有次畀通告八婆蜂時，我見到嗰個女PA嗰組都有通告，咁橫掂都係電話留言，我咪講埋畀佢聽仲有另一組通告囉。原來八婆蜂條友扮冇收到女PA嘅通告，跟住拍嘅時候冇到，監製當然大興問罪之師，八婆蜂就屈女PA話佢畀漏通告，最後要女PA同八婆蜂道歉先完結呢件事。」
李察豬耳追打PA（暗示方中信）
坐公司車回程時，聽到導演老屎忽講：「嗰陣仲喺清水灣電視城，未輪到李察豬耳拍，條友飲咗啲酒再喺自己車度瞓覺。到差唔多要埋位，套劇嘅PA走埋去，諗住叫醒佢，唔知個PA寸七七，定係豬耳真係醉咗，總之佢突然間發狂，仲從佢架車衝出嚟，一拳打埋PA度！」
無晉升機會
「前嗰排去保羅老師婚宴，先收到風，當年同我一齊入行嘅PA（做咗7-8年），今日都仲係PA，點解？唔係好多導演去咗HKTV咩？冇理由冇空位剩㗎喎！原來貴司喺出面請人！據講請嗰啲，仲係啲已經冇拍嘢好耐兼且轉咗行嘅人，譬如係的士司機……」
梁乃鵬責志雲寫序
TVB行政主席梁乃鵬前晚活動上的回應，他將矛頭直指陳志雲。梁乃鵬說：「我唔知點解陳志雲先生會替一個佢完全唔熟悉嘅人作序，你知作序一定要對作者有認識，亦要對作品有認同，如果根據報紙報道，只係朋友託佢，而佢未睇過本書，我覺得做法有啲商榷。」他又說：「呢位PA同事根據報道工作咗7個月，一定唔可以代表TVB所有PA嘅工作生涯，否則唔會咁多人到今日喺TVB工作幾十年，有啲仲變咗知名導演，你睇杜琪峯、王家衛，你睇吓幾多人尊重佢？」
無綫昨晚在《東張西望》特別訪問高層區偉林、李添勝、監製陳耀全及工作4年的PA林肯，談到做PA的工作情况及前途作反駁。無綫去年11月開始封殺壹傳媒，近日鑑於壹傳媒接連在雜誌及報章報道有關無綫的負面新聞，昨日向藝員發出內部通知短訊，提醒如收到壹傳媒記者電話要加倍小心。
短訊內容主要指：「大家都可能留意到壹傳媒屬下雜誌及報章近期一連串對TVB的失實報道，把不相干的事情硬扯在一起，毫無根據地編造故事。 其中包括報道指江美儀拍劇踩足三日，爆肺入院，在休息期間被『劇組逼復工』。事實是有雜誌記者致電美儀假裝問候， 其後出來的報道和講的完全不同， 意圖抹黑公司和同事。自去年11月將壹傳媒列為不受歡迎媒體，本公司及藝員活動不接受其採訪，希望大家留意，如收到壹傳媒記者電話，要加倍小心。」
陳志雲有份幫該位前無綫PA出書寫序，似有暗撐之嫌？陳志雲解釋：「前商台DJ話有朋友出書，叫我幫手寫序，年輕人創作要支持。其實他已送了電子版給我看，不知幾多是真，幾多是假，總之內容方面創作和事實都有。」對於王晶於網上炮轟該前PA無聊加無恥，陳志雲叫大家當作為一個創作，或一個年輕人的體驗分享，不要計較資歷。
吳卓羲昨日接受電話訪問時，對於有指他趕滿身汗味的替身落車，他坦言：「絕對冇咁嘅事，如果臭，最臭就係我同林峯，係都我哋落車先，我哋同啲武指、替身都好熟，大家由細識到大，替身衫我自己都會着，點會嫌人臭？至於話啲服裝同事拮親我，人哋咁專業，點會拮到我，佢哋亦係我前輩，錫佢哋都嚟唔切啦！」吳卓羲指與很多PA都是好朋友，不過對於出書的前PA卻毫無印象。
另一位當事人林峯昨日於電視廣播城接受訪問，對於被指滿口粗言，他謂：「自己只想講一句說話，我做咗十幾年，唔好問我，可以問其他工作人員我有冇咁樣，我唔想幫人哋做宣傳，但啲同事戥我唔抵，仲話識咗我十幾年，唔好話講粗口，都未見過我鬧人，呢啲係惡意抹黑。」與吳卓羲一樣，林峯並不認識該PA。
對於公司叮囑藝人對個別傳媒的採訪加倍留神，江美儀非常贊成，她謂：「依家我都唔敢接電話，啲報道話我冇化妝冇所謂，但如果利用我攻擊其他人就萬萬不能，之前我唔舒服，公司好好，仲畀時間我休息，復工後，劇組亦盡量遷就我，本來好好一件事，寫到完全本末倒置，咁好唔應該。」
無綫製作資源部總監樂易玲昨午透過短訊形式發出內部通告，提醒藝員部各同事要小心壹傳媒旗下所有刊物，她說：「今次唔單止係藝員，連工作人員同經理人同事都要提醒，因為好似江美儀事件咁，連一個問候電話寫出嚟都變成咁，而林峯同吳卓羲就更加無辜，無啦啦畀人抹黑。」製作部總監曾勵珍昨日則指寫書的前PA僅得半年資歷，根本沒資格批判任何事：「我都唔明對方咩用心，用冇常識嘅內容去誣衊人，無中生有唔係事實，又何必呢！」
偽文豪昨晚知《東張西望》反擊，他即在fb留言：「我聽人講，今日《東張西望》幫我本書做勢喎，係唔係有啲咁嘅事呀？所以話世上只有TVB好。」
王晶寸未夠資格鬧人
在無綫做了7個月的前助導偽文豪，在網上和出書罵前公司的演員和上司，王晶日前在微博批評偽文豪的行為是無聊加無恥的「X樣」。昨日記者再致電給王晶，他說：「我覺得一個只做咗7個幾月嘅員工去批評呢個嗰個，真係未夠資格，呢種行為唔值得鼓勵，所以陳志雲作為某大傳媒機構高層竟然幫呢個人寫序，更加離譜。」
王晶認為這個無綫前助導的說話對某些人已構成誹謗，隨時要面對法律責任，他說：「如果講我，我一定告佢誹謗，佢只做咗幾個月助導，對機械操作可能未了解，對成個圈係點都未搞清就爆人料，會唔會太片面，要鬧要爆料真係未輪到佢。」
此外，李力持昨在微博留言指自己當年在無綫打工搵命博，不為錢，只為一張導演卡片。對於爆料的偽文豪，李力持留言說：「非常讚賞作者不用真名，假名不用上身又可以加些戲劇誇張，反正市場要八卦不要事實！最後祝前程錦繡！條條大路通羅馬！我期待在成功的山頂上遇到你！」