32D魔鬼胸蔚雨六月中出閘。o靚模搵食難，歌手同樣唔見風光，十九歲蔚雨芯坦言呢鋪搏到盡，冇得輸！

去年蔚雨芯隨阿叻到墨西哥拍旅遊特輯，憑一幕32D餌誘魔鬼魚從此被封「魔鬼胸」。當天王天后賣碟都得幾千張的市況下，曾在校際歌唱比賽獲獎無數的蔚雨芯，入行兩年更加無乜收穫。難得被塑造成「魔鬼胸」，食住上放低歌手包袱，出寫真搏一鋪！

蔚雨芯出寫真是為勢所迫。「我喺細規模嘅公司出身（陳百祥揸旗的 Snazz），唔會有好多 budget捧新人，所以我同走咗嘅師姐 JJ一樣，一直都係自力更生靠自己。我等咗四年，出道兩年，要搏就趁仲後生。今次出寫真都係我同啲同事搵投資者返嚟。

「我唔係簽大公司，電台唔會睬我，出寫真可以配合新歌宣傳，就算電台唔播，至少都有機會引起外界注意。依家做歌手唔可以再獨沽一味，出寫真係想搵更多出路，希望有電影同廣告拍，就算屋企唔使我養，我都想賺錢，唔使再攤大手板做人。」蔚雨芯說。

一一年，一心想當歌手的蔚雨芯由老闆娘黃杏秀提名選港姐，十七歲未夠秤，加上早熟身材，面試已經矚目。以為有無綫之友阿叻鋪橋搭路，外界同當事人以為入圍十拿九穩，豈料連初賽都入唔到。
重提港姐脫腳一事，原本有碗話碗的蔚雨芯也要避重就輕：「咁咪證明無綫係冇造馬。選唔到港姐，咪做番歌手囉！」
JJ離開阿叻旗下後，有傳「浸大 E神」楊焉跟蔚雨芯爭寵。但睇走勢，似乎是由嫩口的蔚雨芯接 JJ棒，坐正阿叻頭號愛將地位。

蔚雨芯十三歲參加雜誌校花選舉落敗後，卻被阿叻睇中簽下六年賣身契。原打算一邊讀書一邊接受演藝訓練，待中學畢業才正式出擊的她，課餘做兼職 model，是校內風頭躉的同時，也是同學杯葛對象，結果讀到中三，她便決定輟學。

打滾兩年，終於體會到學歷低是前途絆腳石；加上有同門對手浸大 E神楊焉刺激，十九歲的蔚雨芯對症下藥，要幫自己補墨水。

「我唔介意俾人知道讀書少，既然少就惡補，盡力做番好！依家搵咗老師惡補英文同普通話。」蔚雨芯說。